FA Sápmi ii šatta searvat Conifa Euro Cupas dán geasi, go eai ožžon ruhtadoarjaga maid ledjen ohcan Norgga Sámedikkis.
FA Sápmi ii šatta searvat Conifa Euro Cupas dán geasi, go eai ožžon ruhtadoarjaga maid ledjen ohcan Norgga Sámedikkis.
Conifa Euro Cup čiekčamat lágiduvvojit geassemánu 4.beaivvis 11.beaivái Davvi-Kyprosis, muhto FA Sápmi ii beasa sáddet spábbačiekčanjoavkku čiekčamiidda go ii leat ruhta dasa.
Čoahkkimiidda manna ruhta
– Sivvan lea go Norgga Sámediggi hilggui FA Sápmi ohcama prošektii masa lei ohccon 150 000 ruvnno. Čujuhuvvui ahte FA Sámis lea doaibmaruhta mii lea 313 000 ruvnno, muhto dát ruhta han lea FA Sámi doaibmanruhta nu ahte sáhttit čađahit ovdamearkka dihte stivračoahkkimiid njeallje geardde jagis, ja eará dehálaš čoahkkimiid, čállá FA Sámi presideanta Håkan Kuorak preassadieđáhusas.
FA Sápmi lei bušeteren 200 000 ruvnno Conifa Euro Cup 2017 oassálastimii.
Sihtá lasihit doarjaga
Ovddit Sámediggeráđđi lea čujuhan prošeaktadoarjagiidda mat gávdnojit ohcan ládje FA Sápmi doaimmaide.
– Jus FA Sápmi galgá oassálastit Sámi spábbačiekčanjoavkkuin boahtteáiggis, de ferte Norgga Sámediggi lasihit doarjaga, go ságas lea ahte searvvit jo ožžot doaibmaruđaid Norgga Sámedikkis, lohká Kuorak.
Gilvvut boahtte jagi
Conifa lea bovden nissonspábbačiekčanjoavkku Conifa World Cup 2018 gilvvuide, masa FA Sápmi áigu searvat seammás go dievdduid spábbačiekčangilvvut leat.
FA Sápmi lea maid dieđihan beroštumi searvat Conifa Youth Cup gilvvuide, mat leat Isle of Man sullos suoidnemánus 2018:s.
Spábbačiekčangilvvut leat mánáide geat leat gaskkal 8 ja 12 jagi boarrásat.
Ollu plánat dán jagi
FA Sápmi presideanta muitala maid ahte sii áigot searvat Piteå Summer Games čiekčamiidda guvttiin joavkkuin; 16 jahkásaš bártnit ja nieiddat.
Čiekčamiid lea ruoŧabeale almmolaš árbefoanda dorjon ruđalaččat.
Skábman lea maid plána lágidit nissoniid riikkačiekčama, mii galgá lágiduvvot Beardugoržžis Norgga bealde Sámis. Ii leat vel čielggas gean vuostá FA Sápmi galgá čiekčat.
