Barget go dán áigge olbmot árbevirolaš čakčabargguid šat, Ávvir lea jearahallan dábálaš olbmuid dan birra.
Barget go dán áigge olbmot árbevirolaš čakčabargguid šat, Ávvir lea jearahallan dábálaš olbmuid dan birra.
Sámi árbevirolaš čakčabarggut leat murjen, suidnen, murren ja bivdu, muhto astet go dán áigge olbmot dahkat dáid?
Kárášjoga čoahkkebáikkis orro leamen ahte olbmuin ii leat hoahppu. Olbmuiguin geaiguin Ávvir humadii eai lohkan dan áiggi šat nu dárbu bargat dáid bargguid, go ruđain oažžu buot ja olbmuin lea dilihisvuohta.
Muhtimiidda dattege gal lei dehálaš seailluhit ja doalahit árbevirolaš máhtuid.
Govven: Risten Hætta
Ánne Kátjá Gaup
Ahki: 18
Eret: Guovdageainnus
– Mun lean orron dáža servodagas ja in leat šaddan dieid bargguid vuoruhit. Mun lean bajásšaddan boazodoallobearrašis ja lean oahppan buot čakčabargguid. Munnje lea dehálaš seailluhit árbevieruid.
– Leat go lubmen dahje áiggut go vuolgit?
– Dan in jáhke go in astta, lean juste fárreme dal go lean álgime oahpahallin NRK Sápmái. Muhto boahtteáiggis háliidan gal oahpahit iežan mánáide árbevirolaš bargguid, bohkosa Ánne Kátjá.
Govven: Risten Hætta
Trine Guttorm Anti
Ahki: 45
Eret: Kárášjogas
– Mus leat rievtti mielde guokte «eallima» leamaš. Mun lean oahppan unnivuođas buot, muhto go ollesolmmožin šadden de náitalin boazobártniin ja álgen eanet boazodoallobargguid bargat čakčat. Vaikko ieš in lubme de láve mu áhčči munnje dan dahkat, ja viellja fas murret. Lea nu álki go oaččut ruđain buot ii dárbbaš šat bargat diet bargguid. Muhto hui dehálaš livččii seailluhit dološ máhtuid.
Govven: Risten Hætta
Johannes Mathis Anti
Ahki: 64
Eret: Kárášjogas
– Mun gal lean eallilan olmmoš ja lean agibeaivvi bargan dieid bargguid. Čakčat ferte buot bargat. Mus gal lea ollu bargu mun murren ieš, suidnen, lubmen ja boazohommát álget maid dal. Dat ferte dieid visot bargat, go goikkehiid galggat dálvet coggat de fertejit suoinnit leat, vaikko dal leat ge diet ođđaáigásaš «gámaolggožat» maid bidjá goikkehiid olggobeallai de mu mielas gal lea suoidni buoremus. Mus gal lea ain jáhkku ahte geat meahcástallet gal fertejit doalahit árbevirolaš bargguid, go erenoamážit boazodoalus de fertejit leat muorat, gápmagat ja buorit gárvvut vai ii galbmo. Muhto balan gal ahte gal dat láhppojit buot diet máhtut. Go ruđa fámuin oažžu dán áigge buot.
Govven: Risten Hætta
Sara Christine Eira
Ahki: 23
Eret: Kárášjogas
– Mun lean oahpan buot čakčabargguid. Lean moadde jagi orron gávpogis go lean studeren. Muhto dal dan jagi lean válljen dáppe ruovttus orrut go háliidan bargat ovdamearka dihte čakčabargguid ja muđuid ge buot sámi árbevirolaš bargguid. Munnje lea hui dehálaš seailluhit buot bargguid maid lean oahppan.
