Sámediggi lea addán NTNU:i 30 000 ruvdnosaš doarjaga lágidit lullisámegiellakurssa bargiide ja studeanttaide.
Sámediggi čállá preassadieđáhusas ahte Norgga teknihkalaš – Luonddudieđalaš Universitehta (NTNU) Tråantes háliida loktet lullisámegiela máhtu skuvllas, erenoamážit Oahpaheaddjeoahpu instituhtas. Mihttomearrin lea ahte bargit dieđalaš virggiin ožžot vuođđomáhtu lullisámegielas maid sii sáhttet geavahit oahpahusas ja dutkamis.
– Illudan beassat oaidnit sámi gielladoaibmabijuid regiovnna stuorámus universitehtas. Ohcci áigu bidjat sámegiela eanet oidnosii dainna lágiin ahte fállat kurssa buot bargiide, ja dat dagahivččii vejolažžan ásahit giellabirrasa NTNU:i guhkit áiggi vuollái, dadjá sámediggeráđđi Mikkel Eskil Mikkelsen (NSR) preassadieđáhusas.
Eanet beroštupmi
NTNU dieđuid mielde lea lassánan beroštupmi ja diehtomielalašvuohta sámegielaide maŋŋá UNESCO «Year of Indigenous Languages 2019», ja sii oaivvildit ahte lullisámegielkursa bisuhivččii dán beroštumi, illun sámediggeráđđái.
– Lea hui vuogas oaidnit ahte diimmá álgoálbmotgielaid riikkaidgaskasaš giellajahki lea vuolggahan oalgeváikkuhusaid, ja ahte dakkár stuorra ásahus go NTNU loaiddasta buorrin ovdamearkan, dadjá Mikkelsen preassadieđáhusas.
Sámediggeráđi juolludus čuovvu Muohtačalmmit-julggaštusa, Sámediggeráđi álggahanjulggaštusa vuoruhemiid, mas earret eará deattuhuvvo dehálažžan sihkkarastit ahte sámegielat gullojit ja geavahuvvojit.
