Dál lea vejolašvuohta ohcat ruhtadoarjaga nannet ja čalmmustahttit sámegiela ja kultuvrra Finnmárkkus.
Dál lea vejolašvuohta ohcat ruhtadoarjaga nannet ja čalmmustahttit sámegiela ja kultuvrra Finnmárkkus.
Finnmárkku fylkkagieldda bušeahttapoasta «Ruhtadoarjaga sámi ulbmiliidda» lea ohcanvuđot doarjjaortnet man váldoulbmil lea oaččuhit eanet mánáid ja nuoraid searvat sámi servodateallimii, vuosttamužžan giella- dahje kulturdoaimmaid bokte.
Dehálaš bušeahttapoasta
Fylkkasátnejođiheaddji Ragnhild Vassvik oaivvilda bušeahttapoastta dehálažžan go dat addá vejolašvuođa čađahit ollu buriid doaibmabijuid mat ovddidit sámegiela, kultuvrra ja servodateallima Finnmárkkus.
– Bušeahttapoasta lea dehálaš váikkuhangaskaoapmi sámegiela ja kultuvrra nannemii Finnmárkkus. Min fylkkas lea stuora beroštupmi ja máhtolašvuohta sámi áššiide ja dan háliidit mii doarjut. Jagiid mielde leat moanat buorit prošeavttat čađahuvvon bušeahttapoastta ruđaid bokte, ja sávvamis oažžut seamma ollu ohcamušaid 2018:s go 2017:s, dadjá Vassvik.
Guokte sámi kultuvrra Finnmárkkus
Finnmárkui gullet guokte sámi kultuvrra: davvisámi- ja nuortalaškultuvra.
Fylkkasátnejođiheaddji Ragnhild Vassvik mielas lea dehalaš nannet ja čalmmustahttit maiddái nuortalaškultuvrra.
– Mu mielas lea dehálaš deattuhit ahte lea vejolaš ohcat doarjaga prošeavttaide mat ovddidit nuortalašgiela ja kultuvrra seamma go prošeavttaide mat ovddidit davvisámegiela ja kultuvrra, cealká Vassvik.
– Doarjja sámi ulbmiliidda deattuha doaimmaid mat lasihit oassálastima ja beroštumi sámi kultuvrii, erenoamážit min fylkka mánáin ja nuorain. Danne ávžžuhit organisašuvnnaid, joavkkuid, servviid ja ovttaskas olbmuid ohcat prošeaktaruđaid buriid prošeavttaide ja doaibmabijuide mat guovdilastet sámevuođa Finnmárkkus, loahpaha Ragnhild Vassvik.
Ohcanáigemearit
2018:s gustojit golbma ohcanáigemeari, dálvet, giđđat ja čakčat.
Vuosttaš ohcanáigemearri lea ođđajagemánu 15. beaivvi 2018. Nubbi ja goalmmát ohcanáigemearri lea miessemánu 1. beaivvi. ja čakčamánu 15. beaivvi. 2018.
Elektrovnnalaš ohcanskovi gávnnat Finnmárkku fylkkagieldda neahttasiidduin.
