Sámediggeráđđi lea juolludan 150 000 ruvnno Návuona suohkanii ja 155 000 ruvnno Burfjord Travelii ásahit giellaarenaid giellaealáskahttimii.
Preassadieđáhusas dieđiha Sámediggi ahte Sámediggeráđđi lea juolludan ruđa doarjjaohcciide Návuona suohkan ja Burfjord Travel. Dain lea ulbmilin fállat vejolašvuođaid loktet giellagelbbolašvuođa ja dakko bokte maiddái nannet sámiid identitehta mearrasámi guovlluin.
– Sámegielas leat unnán giellaarenat Návuona suohkanis, čállá Sámediggi.
Giellakursa
Návuona giellaguovddážii lea juolluduvvon doarjja lágidit giellakurssaid rávisolbmuide geat ovdalaččas eai máhte sámegiela. Ulbmil lea movttiidahttit sámegiela geavaheapmái suohkanis, ja eambbo giellaguoddiid bokte boahtteáiggis rekrutteret oahppan olbmuid oahpahit sámegiela skuvllas. Burfjord Travel, Mikkel Eivind Oskal bokte, áigu ges fállat giellaarena mánáide, nuoraide ja rávisolbmuide gos árbevirolaš bargguid bokte besset oahppat ja nannet sámegielmáhtuset. Ohcci áigu ovttasbargat Návuona giellaguovddážiin.
– Suohkaniin gos sámegielas ii leat nu nanu sajádat, nu go ovdamearkka dihte riddosuohkaniin, leat dákkár doaimmat dehálaččat bisuhit ja nannet giela. Giellaarenaid ja kurssaid bokte háliidit boktit beroštumi sámi árbevirolaš bargguide, ja dainna lágiin maiddái nanusmahttit sámi iešdovddu, dadjá sámediggeráđđi Mikkel Eskil Mikkelsen (NSR) preassadieđáhusas.
– Sámediggeráđđi oaidná positiivvalažžan go suohkaniin leat guhkit áigge strategiijat gielladoaimmaiguin maid čađahit. Doarjagat juolluduvvojit doarjjaortnegis Giellaprošeavttat, dieđiha Sámediggeráđđi preassadieđáhusas.
