Sámediggeráđđi juolluda regionálaovddidandoarjaga Árran julevsáme guovddážii gitta 230 000 ruvnno rádjái prošektii Sámi kulturárbi máhcahuvvo ruoktot – čájáhus Bååstede.
Birrasii 4200 dávvira miehtá Sámi, mat ovdal leat čohkkehuvvon ja šaddan oassin Norgga Álbmotmuseas ja Kulturhistorjjálaš museas Oslos, galget 383 dávvira dál máhcahuvvot Árran julevsáme guovddážii, dieđiha Sámediggi preassadieđáhusas.
Dat dávvirat galget dál čájáhussii.
– Illudahttá oaidnit go viimmat dáhpáhuvvagoahtá juoga čoahkkádusain, ja fargga besset olbmot viimmat oaidnit muhtun dávviriid. Bååstede-prošeavtta bokte galget sámi museat váikkuhit dan ahte sámi álbmot beassá vásihit ahte sii ožžot ruoktot sin iežaset kulturárdna ja dieinna lágiin váikkuhit sámi giela, kultuvrra ja identitehta ealáskahttima. Dat lea máilmmi deaŧalaš, dadjá sámediggeráđđi Mikkel Eskil Mikkelsen.
Álbmogii leat olámuttos
Čájáhusa váldomihttomearri lea vuosttažettiin buktit Bååstede-čoahkkádusa sámi álbmoga olámuddui. Máhcahuvvon dávvirat galget váikkuhit eanet máhtu, áddejumi, čeavláivuođa ja lagašvuođa iežas kulturárbái.
– Dat lea deaŧalaš ja gelddolaš regionála ovddidandoaibmabidju man ektui mii maiddái ovttasbargat fylkkagielddain, dadjá nubbi eará sámediggeráđđi, Silje Karine Muotka.
Čuvget duodjeárbevieruid
Dasa lassin galgá čájáhus tematiseret duodjeárbevieruid čuvgen dihtii surggiid sámi kultuvrras mat leat leamaš guovddážis sámi servodagas nissonolbmuid ektui. Áiggi mielde lea maiddái plánejuvvon oažžut beroštumi mánáid ja nuoraid bealis, ja ahte čájáhussii sáhtášii siskkildit bargobáji duojis ja gielas ja čatnat fálaldaga kultuvrralaš skuvlalávkii.
– Dalle go sámi museat, ja dán oktavuođas Árran, dál ožžot dávviriid ruovttoluotta, de lea deaŧalaš láhčit nu ahte dáid dávviriid sáhttá gaskkustit museafágalaš vugiin dasa lassin ahte dávvirat galget sihkkarastojuvvon mieskama vuostá, dadjá sámediggeráđđi loahpas.
Bååstede mearkkaša ruovttoluotta máttasámegillii, ja kulturárbeprošeakta mii váldá vuolggasaji Norgga geatnegasvuođain sámiid guovdu go lea álgoálbmot.
