Nuorta-Finnmárku Regiovdnaráđđi ja SeastinBáŋku 1 Davvi-Norga áigot Servvodatloktema bokte ovttas ruhtadit prošeavtta mas lea ráđđeaddinpáhkka báikkálaš ealáhussii. Lea stuorra dárbu ráđđeaddimii ja oaivadeapmái min báikkálaš fitnodagaide dan ekonomalaš roasu dihtii mii lea čuožžilan koronapandemiija geažil.
Nuorta-Finnmárkku Regiovdnaráđđi ja SeastinBáŋku 1 Davvi-Norga áigot Servvodatloktema bokte ovttas ruhtadit prošeavtta mas lea ráđđeaddinpáhkka báikkálaš ealáhussii. – Lea stuorra dárbu ráđđeaddimii ja oaivadeapmái min báikkálaš fitnodagaide dan ekonomalaš roasu dihtii mii lea čuožžilan koronapandemiija geažil. Vai sáhttá čađahit prošeavtta, de leat mii bivdán Girkonjárgga Ealáhusagárddi, Sápmi Ealáhusgárddi, Hermetikken Ealáhusgárddi ja Linken Ealáhusgárddi, dieđiha Nuorta-Finnmárkku Regiovdnaráđđi.
Fálaldat, mii dál lea vuođđuduvvon, lea čujuhuvvon daidda fitnodagaide ja ovttaskas fitnodagaide mat eai gula ealáhusgárddiid fitnodatčujuheaddji doaimmaide. Prošeavtta bokte háliidat mii olahit eanemus lági mielde oassálastiid báikkálaš ealáhusas, beroškeahttá lea go ealáhusgárddi miellahttu vai ii, deattuhit sii preassadieđáhusas.
Eaktun vai sáhttá oažžut ráđđeaddima prošeavtta bokte lea ahte fitnodagas lea čujuhus Nuorta-Finnmárkku Regiovdnaráđi doaibmaguovllus. Dát guoská gielddaide Mátta-Várjjat, Unjárga, Deatnu, Davvesiida, Gáŋgaviikka, Bearalváhki, Báhcavuotna, Čáhcesuolu ja Várggát.
