Sámediggi lea juolludan oktiibuot logi miljovnna kultursuorgái. Ohcciid gaskkas leat dovddus namat nugo Felgen Orkester ja Elin Kåven.
Sámediggeráđđi lea juolludan oktiibuot 21,9 miljovnna ruvnno doarjjan árbedieđu, dearvvašvuođa, ealáhusaid, giela ja máhtu oktavuođas áigodagas skábmamánu 2014 rájes dán jagi guovvamánu rádjai. Dán dieđihit sii preassadieđáhusas.
Maiddái girjjit
Birrasii 10 miljovnna ruvnno leat dál juolludan kultursuorgái, earret eará leat addán doarjaga ollu CD- almmuhemiide ja girjealmmuhemiide. Dat boahtá ovdan Sámediggeráđi raporteremis dan birra maid leat dahkan mannán dievasčoahkkima rájes juovlamánus.
– Mii leat juolludan doarjaga olles 18 ođđa CD-almmuheapmái. Ohcciid gaskkas leat dovddus namat earret eará Felgen Orkester ja Elin Kåven, muhto maiddái leat juolludan gelddolaš almmuhemiide árbevirolaš luođi siskkobealde, cealká sámediggeráđđi Ann-Mari Thomassen.
Doarjja lea maiddái addon 31 girjealmmuheapmái davvi-, julev- ja máttasámegillii.
Doarjja Romssa universitehtii
Romssa universitehta Finnmárkku fakultehta lea maid ožžon doarjaga golmma sierra prošektii nu go veahkaváldi lagaš gaskavuođain, álgoálbmogat ja sosiála bargu. Dasto leat addán doarjaga kártet makkár eallinhástalusaid vásiha boazodoalli geas leat dearvvašvuođaváttisvuođat go váldá oktavuođa NAV:in.
Háliidit rabasvuođa
Sámediggeráđđi čállá ahte sii hálidit nannet rabasvuođa Sámedikki doarjjahálddašeami ektui, ja áigot danne almmolašvuhtii dieđihit doarjjaruđaid geavaheami juohke sámediggeráđi dieđáhusas Sámedikki dievasčoahkkimii.
Dá leat CD-doarjagat:
Cantus, Troandin: Cd almmuheapmi kr 128 000
Rieban: Cd Bernt Mikkel Haglund kr 145 000
Frode Fjellheim: Cd Katarina Barruk kr 105 000
Frode Fjellheim: Cd Marja Helene Fjellheim Mortenson kr 165 000
Johan Sara jr: Cd “Doalli” Anders Nils Eira kr 113 000
Johan Sara jr: Mearrasámi ovdaprošeakta ja Cd almmuheapmi kr 125 000
Max Mackhé: Cd almmuheapmi ja turneadoarjja kr 90 000
Audioland AS: Cd almmuheapmi Marit K. Hætta Sara kr 140 000
Alvvat AS: Almmuhit julevsámi sálbma-cd kr 140 000
DAT AS: Lullisámi CD almmuheapmi Elen Kristina Utsi kr 142 000
Superstory Jan Rune Måsø: Cd-almmuheapmi kr 75 000
Per William Hermansen: Luohte-CD kr 144 000
Mette Henriette Martedatter Rølvåg: Cd almmuheapmi kr 105 000
DAT AS: Ima-mánážat CD almmuheapmi kr 113 000
Čálliidlágádus AS: Árbevirolaš luohte CD 150 000
Global Movement of cyan, Áltá: Cd almmuheapmi kr 160 000
Saha records: Cd almmuheapmi Felgen orkester kr 173 000
Elin Kåven: Cd almmuheapmi, solo skearru kr 113 000
