Dán jagi «Krafttak mot kreft» ruhtačoaggin lea Vipps bokte.
Dán jagi čoaggá Borasdávdasearvi ja «Krafttak mot kreft« ruđa Finnmárkkus njukčamánu 14. beaivvis gitta njukčamánu 20. beaivái
Ruđain galgá dutkat borasdávdda leavvama. Jurdda lea ruhtadit dutkama mii galgá addit eambbo áiggi borasdávdapasieanttaide geain lea dávda leavvan.
Stuora ballu ahte leavvá
Golmmas njealji olbmos Norggas cevzet borasdávdda buozalmasvuođas.
– Muhto borasdávdda mielde čuovvu ballu, juoga mii sáhttá leat vel vearrát. Ii oktage borasdávdapasieantta, dahje oapmahaš, háliit gullat dan sáni ahte dávda lea leavvan, čállá Guovdageainnu «Krafttak mot kreft» čoagginjođiheaddji Elisabeth Kneppen-Strømeng Olsen.
Ruhtačoaggin Guovdageainnus
Borasdávdadutkan mii galgá addit ođđa ja buoret dikšunvugiid ovdána beaivvis beaivái sihke Norggas ja máilmmis. Dáid dutkiid ja sin barggu lea áigumuš doarjut dán jagáš «Krafttak mot kreft» ruhtačoaggimiin.
– Guovdageainnus mii čoaggit ruđa Vipps bokte. Mis lea maid nu lihkku ahte dán jagi áigot russat vázzit viesuid mielde njukčamánu 15. beaivvi čájehandihte ahte sii dorjot dán ruhtačoaggima. Sis leat Vipps-plakáhtat mielde. Koronadili geažil ii leat dán jagi vejolaš addit reaidoruđaid, čállá Elisabeth Kneppen-Strømeng Olsen preassadieđáhusas.
Maiddái duodjemárkaniin Báktehárjjis šaddá vejolašvuohta addit ruđa «Krafttak mot kreft» ruhtačoaggimii.
