-Almmuhus-
-Almmuhus-
-Almmuhus-
OĐĐASATRonja oaččui bálkkašumi 

Ronja oaččui bálkkašumi 

-

-

Son muitala su ja su eatni eallinvásáhusa birra, ja oaččui fuomášumi dan ovddas.

Ronja-Katrin Larsen oaččui mannan vahkku kulturbálkkašumi Rana suohkanis. Suohkana vuođuštus lea ahte son earret eará geavaha iežas vásáhusaid mánnávuođas Divttasvuonas ja Ranas gosa fárrii 2005:s.

– Sus lea nanu jietna ja buvttada maid ieš lávlagiid. Son geavaha musihka bidjat sániid tabuáššiide. Su eadni lei okta sis gii bođii ovdan doarrun dihte seksuálalaš veahkaváldima ja veahkaváldima vuostá Divttasvuonas. Maŋit áiggi šattai beare lossat su eadnái, ja son valljii sorbmet iežas. Dan doarruma earret eará lea Ronja-Katrin Larsen háliidan gaskkustit iežas musihkas, čállá suohkan sin juolludeami birra.

– Dat lea hui mávssolaš munnje. In leat ollen seaivut maŋŋel dan, muhto lean nu giitevaš. Nu somá go mu váibmoáššit ožžot fuomášumi, namalassii musihkka ja psyhkalaš dearvvašvuohta. Addá vel eanet movtta, dadjá Ronja-Katrin Larsen.

Larsen lea ikte geargan iežas bihtá «Doajvvo» čájálmasmátkkiin, mii leat musikála mas su teavsttat ja šuoŋat leat. Čájálmasas muitaluvvo movt dat lea bajásšaddat čiegusvuođa suoivvanasas.

– Lea sihke buorre ja bávččas leamaš, eanas buorre. Ožžon ollu rámi, ja dovddan ahte lean eanet oadjebas čájálmasas dál. Lean ovdánan. Lea gal buorre ollet ruoktot, go dovddan ahte lean váiban, muitala Larsen.

Máhccái

Liikká lea jeđđehus sutnje go diehtá ahte su eadni livččii leamaš ilus go sudno vásáhus boahtá ovdan.

– Ovdal go iežas sorbmii, de lei son hui rabas ahte dat lei dehálaš sutnje ja ahte lei dehálaš čalmmustahttit dan. Go ožžon dan vejolašvuođa, de lei diehttelas ahte galgen váldit dan. Dihten ahte eatni mielas livčče ortnegis, ja ahte dat lea dehálaš, dadjá Larsen.

Disdaga lei maŋemus čájálmas Evenáššis. Vaikko Divttasvuona suohkan ii gávdno šat, muhto sii leat leamašan Hábmeris, Áhkánjárggas ja Gásluovttas čájálmasain.

– Dat lei hui garra vásáhus. Dihten ovdagiitii ahte nu šaddá, ja lei earenoamáš čuožžut das. Máŋggas dihtet mu historjjá, muhto eai leat gullan mu muitaleame dan. Šattái hui earenoamážin, muitala Larsen.

-Almmuhus-