Romssa ja Finnmárkku stáhtahálddašeaddji dieđiha ahte geatkeearri A-guovllus Romssas lea dievvan. Lea vejolaš bivdit 7 geatkki B-guovllus. Finnmárkku A- ja B-guovllus eai leat velá ovttage geatkki báhčán.
Guovlu 8 boraspirelávdegoddi mearridii geatkebivdineari Romsii ja Finnmárkui miessemánu čihččet beaivvi. Lávdegoddi rabai sihke A- ja B-guovllu. Oktiibuot lea lohpi bivdit 40 geatkki ja 25 dain galget leat njiŋŋálasat. A-guovlu gohčoduvvo hálddašanguovlun mii lea vuoruhuvvon guovlu gos geatki galgá hálddašuvvot nu ahte guovllu nállelogumihttu olahuvvo ja doalahuvvo, čállá Romssa ja Finnmárkku stáhtahálddašeaddji (ovdal fylkamánni namahus) preassadieđáhusas.
Miljøstatus neahttasiiddus lea kárta A- ja B-guovllus. Sárgojuvvon guovlu lea A-guovlu ja sárggokeahtes guovlu lea B-guovlu.
Eanaš varis geatkkit goddon
Romssa guovllus lea liseansabivdinearri oktiibuot 15 geatkki, 9 sáhttet leat njiŋŋelasat. 8 dáid getkkiin sáhttá goddit A-guovllus. Dán 8 geatkkis lea dušše lohpi goddit 1 geatki njiŋŋelasa ja daid reastta varris geatkkit. Leat oktiibuot vihtta bivdi geat leat báhčán dan 8 geatkki ja buot dáid getkkiid leat báhčán seavtti vehkiin A-guovllus. B-guovllus leat velá báhčán 7 geatkki, ja das sáhttá báhčit guhtta geatki njiŋŋelasa.
Ii oktage geatki báhččon Finnmárkkus
Dássážii ii leat oktage geatki báhččon liseansabivddus Finnmárkkus. Geatkeearri lea 25 geatkki ja 16 geatkki sáhttet leat njiŋŋelasat. 8 geatkki sáhttá báhčit A-guovllus ja das oktiibuot 4 njiŋŋelasa.
