-Almmuhus-
-Almmuhus-
OĐĐASAT Romssa ođđa korona­gáržži­dusat

Romssa ođđa korona­gáržži­dusat

-

-

Dál eai beasa eanet go logi olbmo čoahkkanit ja olbmot šaddet geavahit njálbmesuoji dihto báikkiin. 

Bearjadaga čuovganeapmái doaibmagohte ođđa njoammuneastadandoaimmat Romssa suohkanis. 

Romssa gávpogis lea eŋgelas koronavariánta leavvan guokte maŋimuš vahkku ja lagabui 50 olbmos lea koronavirus duođaštuvvon. 

Vaikke suohkan navddii árabut dán vahkkus ahte leat bisseheamen njoammuma, de čájehuvvui ahte servodagas ain leavvá koronavirus. Muhttašuvvan koronavirus njoammu jođáneappot ja danin lea Romssa suohkana ovdagoddi ikte mearridan čuovvulit suohkana váldodoaktára ávžžuhusa ásahit báikkálaš koronagáržžidusaid.

Romssa koronagáržžidusat mat doibmet njukčamánu 5.–18. beaivvi:  

Priváhta besset eanemusat logi olbmo čoahkkanit.

Guossihanbáikkiin galget buot guossit registrerejuvvot.

Hárjehallanstudiot, valáštallanviesut ja vuojadanhállat giddejit. Dušše organiserejuvvon doaimmat mánáide ja nuoraide vuollel 20 jagi ja rehabiliterendoaimmat ožžot čađahuvvot. 

Kollektiivajohtolagas, táksiin, buvddain, gávpeguovddážiid searveareálain ja valáštallan- ja astoáiggelanjain galgá geavahit njálbmesuoji jus ii leat vejolaš doallat unnimusat mehtera gaskka eará olbmuide. 

Vuordán nu guhká go vejolaš

– Romssa suohkan lea vuordán nu guhká go vejolaš ovdal go čavgiimet koronagáržžidusaid. Dál leat gávnnahan ahte lea dárbbašlaš ásahit báikkálaš njoammuneastadandoaimmaid, ja dán vuoru leat geahččalan suddjet mánáid ja nuoraid daid ektui, lohká suohkana váldodoavttir Kathrine Kristoffersen preassadieđáhusas. 

Son geažuha ahte deháleamos doaibmabidju lea ain buhtistit gieđaid, ovttastallat unnán olbmuiguin ja garvit mátkkoštemiid. Romssas ávžžuhuvvojit maid buohkat bargat ruovttukantuvrrain jus lea vejolaš. Lea maid dehálaš ahte olbmot válddihit iskosa jus dovdet dávdamearkkaid dahje jus ballet ahte koronavirus sáhttá sutnje njommon. 

-Almmuhus-