Jus leat Romssas váldán busseruvttuid 100 dahje 105 sotnabeaivvi, geassemánu 20. beaivvi, de bivdá suohkan válddihit iskosa.
Romssa suohkan čállá preassadieđáhusas ahte Romssa njoammun lea joavdan Sis-Romssa militearaleairraide, Skjold ja Setermoen. Doppe leat duođaštuvvon 11 ođđa njoammuma.
Dat 11 soalddaha ledje permišuvnnas Romssa gávpogis mannan vahkkoloahpa, ja válde busse leairraide. Sii válde busseruvttuid 100 (Romsa-Ákkanjárga) ja 105 (Romsa-Øverbygd) sotnabeaivvi geassemánu 20. beaivvi. Dál bivdá suohkan mielčuovvuid dain bussiin leat áicevaččat dávdamearkkaide ja árvvoštallat válddihit koronaiskosa.
– Mii bivdit mielčuovvuid váldit iskosa jus fal dovdet dávdamearkkaid. Dat guoská buot vuolgagiidda mat manne sotnabeaivvi, dadjá fágajođiheaddji Romssa suohkana koronaguovddážis, Øivind Benjaminsen.
Romssa suohkanis leat dál duođaštuvvon 35 njoammuma ja 80 lagasoktavuođa leat erremis.
