Birrasii 80 hoavdda, luohttámušolbmo ja váldosuodjalanáittardeaddji Romssas ja Finnmárkku fylkkagielddain deaivvadedje Romssas gieskat. Fáddá lei kulturceggen ja ođđa fylkkagieldda organiseren.
Duogáš dán Romssa ja Finnmárkku hoavddaid deaivvadeapmái gieskat Romssas lea fylkkaid ovttastahttin oktasašlávdegotti mearrádus, dieđiha Finnmárkku fylkkagieldda gulahallanhoavda Trond Magne Henriksen. Dás daddjo ahte lávdegoddi galgá oažžut árvalusaid mo organiseret Romssa ja Finnmárkku fylkkagieldda – mii šaddá ođđa ossodahkan 2020 ođđajagemánu vuosttaš beaivvi.
Oaiviladdimat ja evttohusat
Prošeaktajođihangoddi, Romssa bargoveagahoavda Stein Ovesen ja Finnmárkku fylkkaráđđealmmái Øystein Ruud čoahkkáigesiiga dán guovtti beaivvi barggu ná:
– Mii leat hirbmat duđavaččat dáinna deaivvademiin. Dás oaččuimet buriid dávistemiid mas lei huksejeaddji sisdoallu. Dál čohkket dáid organiseren oaiviladdimiid ja evttohusaid go joatkit barggu.
Luohttámušolbmuid vuos dasto politihkkariidda
Miessemánu 22. beaivvi lágiduvvo digaštallančoahkkin luohttámušolbmuiguin. Dasto galgá áššeoasálaš lávdegoddi meannudit evttohusaid geassemánu 4. beaivvi ovdal go geigejuvvo politihkalaš dássái.
Bargolávdegoddi meannuda organisašuvdnaevttohusaid geassemánu 11. beaivvi ja oktasašlávdegoddái Kirkonjárggas geassemánu 12. ja 13. beivviid.
Lei KS (gielddaid beroštusorganisašuvdna) mii jođihii deaivvadeami. Ulbmil deaivvademiin lei oahpásmuvvat nubbi nuppiin.
