– Dál oažžut mii nu olu lassi vaksiinnaid ahte buot ássiide lea vuosttaš dosa.
Dan dadjá Romssa suohkana sátnejođiheaddji, Gunnar Wilhelmsen, preassadieđáhusas.
Boahttevaš vahkkuid oažžu Romssa suohkan sullii 3900 eambbo vaksiinna go dan mii álggos lei rehkenaston. Oktiibuot oažžu suohkan 9500 vaksiinna. Sivva dasa lea go Norga oažžu 100 000 lassi Pfizer-vaksiinna. Dat dosat galget juogaduvvot suohkaniidda mat dássážii eai leat vuoruhuvvon.
– Mii leat guhká cuiggodan ahte mis leat unnán dosat. Dál lihkus rievdá dat. Ja dat lea somá oaidnit ahte buohkat geat barget boahkuhemiin fas garrestit nu ahte buohkat geat háliidit ožžot vuosttaš dosa, dadjá sátnejođiheaddji preassadieđáhusas.
Dáid liige vaksiinnaiguin sáhttá suohkan boahttevaš guokte vahkkuid siste fállat buot ássiide vuosttaš dosa.
Sátnejođiheaddji ávžžuha ássiid geat eai leat čálihuvvon boahkuheapmái dahkat dan dál.
– Lea dehálaš ahte nu oallugat go vejolaččat boahkuhuvvojit. Dat lea vai oažžut dárkkistusa pandemiijas. Eai leat buohkat geat leat diŋgon diimmu boahkuheapmái. Ovdamearka dihte vávjit ahte sullii 4500 olbmo gaskkal 18-24 jagi eai leat diŋgon diimmu. Sii ja earáin lea dál vejolašvuohta dan dahkat, dadjá Wilhelmsen preassadieđáhusas.
– Diŋgo diimmu suohkana neahttasiiddus dahje riŋge koronatelefovdnii. Min suohkanis ii leat áigumuš máhcahit vaksiinnaid, loahpaha sátnejođiheaddji.
