-Almmuhus-
OĐĐASATRohttii sámi leavgga vulos ja šlivgii eatnamii

Rohttii sámi leavgga vulos ja šlivgii eatnamii

-

-

Åarjel Njaarke boazodoallonuorat leat suhttan ja oaivvildit dagu nállevealaheapmin.

Ovddit vahkku ledje olbmot čoagganan Bindalii vuostálastit bieggamillohuksenplána Davvi-Trøndelaga ja Nordlándda gaskkas. Doppe lei dáhpáhus olggobealde suohkanviesu dan botta go lei čoahkkin Oljo- ja energiijadepartemeanttain. Dáhpáhus maid Åarjel Njaarke boazodoallonuorat vásihedje unohassan.

 

Loga maid: – Jus dát ii leat rasisma din čalmmiin, de lehpet čalmmeheamet

 

Muhtin nisu gaikkihii sámi leavgga vulos, mii lei leavgastoalppus olggobealde suohkanviesu. Vihttánat lohket nissona bálkestan leavgga eatnan ala, ovdal go šlivgii leavgga muhtin lávu badjel mii das lei.

– Mii leat hirpmahuvvan ja leimmet ollugat geat oinniimet dáhpáhusa. Dovddaimet iežamet dulbmojuvvon, lohka Ina-Theres Sparrok, okta boazodoallonuorain Åarjel Njaarkes Trønder-Aviisii.

 

– Ánut ándagassii

Sparrok oabbá Lene Cecilia lea ge bivdán facebooka bokte nissona átnut ándagassii láhttenvuogi ovddas. Diehtu maid nuorat leat almmuhan facebookai, loktejit sii ášši maid gohčodit nállevealaheapmin. Norgga sámedikki presideanta Aili Keskitalo lea maid juohkán viidáset dán dieđu maid nuorat leat bidjan.

– Nie ii galgga leavgga bilkidit, vaikko makkár leavga livčče. Mánáidskuvlla rájes leat oahppan ahte leavgga ii galgga eatnamii bálkestit ja galgá čábbát dikšut dan, lohka son.

Sparrok ii dieđe nama nissonis gii bálkestii leavgga, muhto diehtá ahte lea okta sis gii háliida bieggamilluid dán guvlui. Dál sávvá son ahte nisu oaidná ávžžuhusa nuorain ja átnu ándagassii.

 

Bieggamillohuksen

Leat plánejuvvon badjelaš 70 bieggamillo dáidda guovlluide mas huksenhaddi lea 2,7 miljárdda ruvnno. Fitnodat Fred Olsen Renewables lea ožžon lobi Norgga čázadat- ja energiijadirektoráhtas (NVE), huksegoahtit bieggamilluid Åarjel-Njaarke ja Voengelh-Njaarke boazodoalloguovlluide. Lea Oljo- ja energiijadepartemeanta ii loahpalaččat mearrida šaddá go huksen. Dan čállá Trønder-Avisa.

-Almmuhus-