ON lea mearridan ahte 2019 galgá leat riikkaidgaskasaš álgoálbmotgiellajahki. Dan háliida Sámediggi čalmmustit giellakonferánssain masa eará álgoálbmoga servet.
Sámediggi lea álggahan guhkes áiggi giellaáŋgiruššama man leat gohčodan Giellaloktemin. Dát lea ollislaš ja ulbmillaš áŋgiruššan sámegielaid ektui buot servodatsurggiin. Sámedikki višuvdna lea ahte sámegielat galget leat lunddolaš, servodatguoddi ja ealli gielat servodagas.
– Min vuođđooaidnu lea ahte dárogiella ja sámegiella galget leat dásseárvvus ja ovttaárvosaš gielat. Dát gáibida nana giellaáŋgiruššama servodagas, nu ahte buot aktevrrat sáhttet váikkuhit sámegielaid loktema, čállá Sámediggi.
Sámi giellakonferánsa lágiduvvo Romssas guovvamánu 4. – 5. beaivvi 2019, ja dan oktavuođas álggaha Sámediggi giellaáŋgiruššama – Giellaloktema, ja dat lea riikkaidgaskasaš álgoálbmotgiellajagi vuosttaš stuorát čalmmusteapmi.
