Dán vahkku lágiduvvo riikaviidosaš Demeansaakšuvdna.
Lea Nasjonalforeningen for folkehelsen mii jahkásaččat lágida Demeansaakšuvnna miehtá Norgga.
Eanebut ja eanebut ožžot demeansadávdda ja dassážii ii leat vel gávdnon dikšun dávdii. Olbmot ellet boarráseabbon ja eanebut ožžot maid de demeanssa.
– Badjel 100 000 norgalačča ellet demeansadávddain ja dat lohku boahtá eanet go duppalastojuvvot čuovvovaš golbmalogi jagi, čállá Nasjonalforeningen for folkehelsen Finnmárkku fylkkasearvi preassadieđáhusas.
Čuohcá olles bearrašii
– Demeansa lea buozalmasvuohta mii čuohcá olles bearrašii. Olu oapmahaččat bidjet olu návccaid iežaset buhcciide láhčit árgabeaidili, ja máŋgasiidda lea váikkuhus das ahte ieža buohccájit. Lea hui stuora dárbu nannet demeansafuolahusa, dárbu eanet fágaolbmuide ja eanet buohcceruoktosajiide. Muhto dat áidna mii sáhttá čoavdit demeansadávdda lea ahte dasa gávdnošii dikšun, čállá Nasjonalforeningen for folkehelsen Finnmárkku fylkkasearvi.
Sii deattuhit ahte áidna jus dat galgá nammasuvvat, de ferte eanet vuoruhit demeansadutkama.
– Lea dárbu bidjat olu eanet návccaid demeansadutkamii go dat mii dál dahkko. Riikkaidgaskasaš Alzheimerbeaivvi, čaksčamánu 21. beaivvi, lágida ge Nasjonalforeningen for folkehlsen jahkásaš ruhtačoagginakšuvnna Demeansaakšuvdnii. Dalle lea buohkain vejolašvuohta doarjut demeansadutkamuša, čállá organisašuvdna vel.
