Vaikko Sámedikki Bargiidbellodagas illudit dasa go Norgga valáštallansearvi (NIF) lea mearridan ahte valáštallansearvvit sáhttet geavahišgoahtit sámegiela, de oaivvildit ahte lea veaháš ártet.
– Lea illudahtti go valáštallansearvvit dál sáhttet geavahit sámegiela, vaikko dat lea váldán áiggi. Dat lea čielga signála ahte valáštallanbiras dohkkeha daid olu iešguđet oktiigullevašvuođaid ja kultuvrraid. Mii leat čađahan guhkes mátkki. Mun oaivvildan valáštallanjoavkkut galggaše ieža válljet háliidit go sámegielnama dahje sámegiel- ja dárogielnamaid. Mu mielas lea hui ártet dál 2023:s ahte fertet bivdit lobi geavahit sámegielnama, lohká Sottinen preassadieđu bokte.
Miessemánu 24. beaivvi mearridii NIF ahte valáštallanjoavkkut sáhttet čállit ieža namaid sámegillii dainna eavttuin ahte lea maiddái dárogielnamma.
«Lea mearriduvvon ahte valáštallanjoavku sáhttá geavahit sámegiela čalmmustahttit iežaset valáštallansearvin, dainna eavttuin ahte valáštallansearvvis lea dárogielanamahus ja namat leat njuolggadusaid mielde. Dat mielddisbuktá ahte sámegielnama sáhttá geavahit valáštallansearvvi čilgehusas nu guhká go dárogielnamma maid čállo dan nama maŋis. Dat lea sihkkarastin dihtii ahte lea dássi gaskal sámi identitehta čalmmustahttimis ja oktasaš nammageavaheami dárbu». Boahtá ovdan NIF almmuhusas.
Galget ipmirdit servodagas
NIF gulahallanossodaga bargi Finn Aagaard čállá e-boasttas čuovvovaččat go Ávvir čujuha Sámedikki Bargiidbellodaga cuiggodeapmái.
– Buot valáštallanjoavkkuin, mat leat miellahttun NIF:s, dain fertejit leat namahusat njuolggadusaid mielde. Namma galgá dohkkehuvvon valáštallanbiirres. Njuolgadusaid ulbmil lea oažžut ovttalágaš nammageavaheami valáštallanjoavkkus, ja sihkkarastit ahte namma doaibmá organisašuvnnas ja almmolašvuođas. Valáštallanstivra oaivvilda ahte lea dárbbašlaš ahte valáštallanjoavkkus sámegielnamain lea maid dárogielnamma, nu ahte nama lea álki ipmirdit bajit organisašuvnnas ja almmolašvuođas. Gáibádus geavahit sihke sáme- ja dárogielnamaid valáštallanjoavkkus gusto maid digitála báikkiide ja eará vuogádagaide main valáštallanjoavku lea mielde, vástida Aagaard.
Son lasiha maid ahte NIF stivračoahkkimis álgorájis ášši ovddiduvvui čuovvovaš hámis:
«Valáštallanjoavku sáhttá geavahit sámegiela čájehan dihtii ahte searvi lea valáštallanjoavku, dainna eavttuin ahte valáštallanjoavkkus lea maiddái dárogielnamma ja dat lea njuolggadusaid mielde».
Dan lea Romssa ja Finnmárku valáštallanbiire ovddidan áššin NIF stivračoahkkimii.
