Statskog lea geargan dán jagáš rievssatlohkamiin.
Dán jagáš rievssatlohkan čájeha čielgasit ahte rievssatlohku lea lassánan Statskog bivdoguovlluin.
– Leat muhtun spiehkastagat, muhto obbalaččat leat buorit logut miehtá riikka. Lea historjjalaš lassáneapmi davvin mii čájeha ahte Statskog guoddevaš hálddašanmálle orru doaibmame, dadjá Statskog bivdo- ja guolasteami fágahoavda Jo Inge Breisjøberget.
Breisjøbergetis lea alddis doaktárgráda rievssathálddašeamis ja oaivvilda ahte giddejuvvon bivdoguovllut ja garra reguleren dalle go rievssatlohku lei unnán, sáhttá leamaš mearrideaddjin manne dál lassána.
– Dat váikkuhii dasa ahte mii nagodeimmet bisuhit elešin rievssatnáli mii dál lea lassáneame go dilli lea buorráneame, dadjá Breisjøberget preassadieđáhusas.
Nordlánddas ja Romssas leat 11 rievssatlohkanguovllu. Logi dain lohkanguovlluin čájehit ahte rievssatlohku lassána. Okta lohkanguovlu Lulli-Romssas čájeha rievssatlogu veaháš njiedjan.
Bivdoguovllut sáhttet giddejuvvot jus rievssatčivgga lohku čájeha stuora njiedjamiid, ja regulerejuvvo jus lea beare garra bivdu.
