Mister nammasaš beana lei eaiggádiin rievssatbivddus. Go galggaiba máhccat ruoktot lulás, de láhppui Mister. Marianne Isaksdatter Triumf mearridii de ahte son galgá gávdnat rievssatbivdi beatnaga.
Mister nammasaš beana lei ovddit vahkku iežas eaiggádiin, gii lea Vågas eret, rievssatbivddus Guovdageainnus. Bivddus láhppui Mister, ja eaiggádis lei bággu ruoktot máhccat, ja nu šattai vuolgit beatnaga haga.
Marianne Isaksdatter Triumf gulai beatnaga birra ja mearridii ahte son áigu beatnaga gávdnat. Alddis lea juste seammalágan beana, ja go gulai olbmot leat oainnestan sullasaš beatnaga márkanis, de diđii son ferte gávdnat dan.
– Mun lean ohcan ja ohcan, vuodján bensiinna guorusin, ja oađđán hejot. Muhto mun dihten ahte beatnaga ferten gávdnat, muitala Marianne gii loahpaloahpas gávnnai Mister nammasaš beatnaga.
Heađáhuvai
Beana lei vahkku jo leamaš láhppon, ja Marianne heađáhuvai. Beanaeaiggát lei maid vuollánišgoahtán, ja sii jurddašedje ahte beana ii šat ceavzze akto. Marianne muitala ahte son diehtá juste dien náli makkár lea, ja man galmmeš dat lea.
– Mun ballen ahte dál gal čoasku dálki, ja de gal ii šat ceavzze beana. Mun sihten olbmuid dieđihit jus oidnet beatnaga, sihten geahččat áittiid vuolde ja iežaset šiljuin, lohká Triumf.
Eará beana veahkehii
Marianne lei váiban ja heađáhuvvan. Logai iežas lagamuččaide ahte son orro vuollánišgoahtán, ii son gávnna beatnaga. Muhto de lei muhtin gii riŋgestii ja muitalii son lea oaidnán ruoidna beatnaga iežas šiljus. Marianne lei jođán biilii čohkkedit ja vuoddját báikái. Go ollii, de ii lean beana šat das. Sii ohce, njurgo ja čurvo. Loahpaloahpas fuomášedje ahte dan viesu beana, mii šiljus orru, guovlá áitte vuollai.
– Beana mii dien vissui gullá, geahčai hirbmosit áitte vuollai. Go de álgen čuovgat dohko, de oidnen, ja čurvejin áhččái; Gea, okta pointer! Reaškkiha Marianne ja illosaddá go muitala fearána.
Beana lei buot ruoidnan ja nelgon, muhto lei aŋkke gieris ja bođii Marianne lusa. Son riŋgii beatnaga eaiggádii, ja eaiggát njuorrasii ja rámidii Guovdageainnu olbmuid go nu čehpet dieđihedje ja ohce.
– Eaiggát lei nu giitevaš, ja rámidii guovdageidnolaččaid hirbmosit, lohká Marianne gii lei nu duhtavaš go gávnnai Mistera.
Marianne lohká beatnaga hui gierisin, ja muitala ahte šaddá váivi sáddet dan fas ruoktot. Dál lea bargame dainna ahte beatnaga sáhttá sáddet ruoktot iežas eaiggádiid lusa.
