-Almmuhus-
-Almmuhus-
OĐĐASATRievdaduvvon stádabušeahtta: – Nu go leimmet sávvan

Rievdaduvvon stádabušeahtta: – Nu go leimmet sávvan

-

-

Disdaga ovdanbuvttii ruhtadanministtar Siv Jensen rievdaduvvon stádabušeahta. Bušeahtas lasihuvvo 13 miljovnna ruvnno sámi ulbmiliidda.

Juohke jagi, miessemánu, ovdanbuktá ruhtadanministtar rievdaduvvon stádabušeahta.

Dán jagáš bušeahtarievdadusas evttoha ráđđehus lasihit doarjaga Sámediggái 10 miljovnnain ruvnnuin, ovdánahttin dihte sámi oahpponeavvuid.

Fágaođastusa ulbmil lea ahte oahppit galget oahppat eambbo ja buorebut, ja vai dainna lihkostuvvá, de fertejit oahpponeavvut ođastuvvot.

Sámediggeráđi lahttu Henrik Olsen lea duhtavaš lasáhusain ja dadjá ahte lasáhus lei nu go ledje sávvan ja vuordán.

– Mii siđaimet ráđđehusa vuoruhit oahpponeavvuid go 2020-2021 skuvlajagi rájes galget ođđa oahppoplánat leat doaimmas, muitala Olsen.

 

Badjel 510 miljovnna


DUHTAVAŠ: Sámediggeráđi lahttu Henrik Olsen lea duhtavaš go ráđđehus evttoha lasihit doarjaga sámi ulbmiliidda.Vuorkágovva: Inga Marie Guttorm

Oktiibuot evttoha ráđđehus lasihit sámi ulbmiliidda 13 miljovnna ruvnno.

2 miljovnna ruvnno juolluduvvo Plassje suohkanii go gullá dál sámegiela hálddašanguvlui, ja miljovnna juolludit ges sámi organisašuvnnaide geat barget givssideami eastademiin.

Dáid ruđaid galgá Sámediggi hálddašit.

Dát mearkkaša ahte sámi ulbmiliidda juolluduvvo 510,1 miljovnna ruvnno rievdaduvvon stádabušeahtas.

Ráđđelahttu lohká ilolažžan dan go dá lea juoga man Sámediggi ieš lea háliidan.

– Lea ilolaš ášši go rievdaduvvon bušeahtas lea lasáhus sámi ulbmiliidda. Dat lea nu go mii leimmet sávvan ja mii leat duhtavaččat go dat lea vuoruhuvvon, dadjá Olsen.

 

Bargat bušeahtain

Rievdaduvvon stádabušeahtta mearriduvvo gaskamuttus geassemánu, ja lea Stuorradiggi mii dan mearrida.

Sámediggi galgá maid rievdadit sin bušeahta, ja rievdadusat leat vuordimis 23. vahkku, go Sámedikkis lea dievasčoahkkin.

– Mii galgat maid meannudit iežamet rievdaduvvon bušeahta, ja mii fertet dieđusge ođasmahttit dan, go dál han mii oaččuimet lassi ruđa. Ja dat gal gievruda min oahppoplána bargguid, loahpaha Henrik Olsen.

 

Ii lean vuordán lasáhusa


ILLOSA: Davvi Girjji nubbejođiheaddji Marit Alette Utsi lea duhtavaš go ráđđehus lea evttohan lasihit oahpponeavvodoarjaga Sámediggái.Vuorkágovva: Anne Rasmus

Davvi Girjji nubbejođiheaddji Marit Alette Utsi illosa go gullá ahte ráđđehus lea evttohan lasihit oahpponeavvodoarjaga Sámediggái.

Son dadjá hirpmástuhtti ođasin dan.

– Diet gal lei hirpmástuhtti ja dien gal in lean vuordán. Lea vuosttažettiin máilmmi buorre sámi skuvllaide ja ohppiide, ja lea hirbmat buorre go luovvana sámi skuvllaide nu ahte sii ožžot oahpponeavvuid mat leat seamma dásis go muđui Norggas. Dehálaš ahte sámi skuvllat eai bázahala oalát, dadjá Utsi. 

 

– Unnán digitála oahpponeavvut

Sámi ohppiid várás leat unnán digitála oahpponeavvut, ja Utsi dadjá dán lasiheami mearkkašit ahte dilli buorrána ovddas guvlui.

Sámediggi ruhtada oahpponeavvobuhtadeami mánáidgárddi dásis gitta joatkkaskuvlla dássái, ja oahpponeavvut leat sihke davvi-, julev- ja lullisámegillii.

– Sámedikkis lea leamaš vátni ruhta maid leat beassan vuoruhit. Ruhta ii leat jullon sihke deaddiluvvon ja digitála oahpponeavvuide, go dat han galget gokčat golbma giela mánáidgárddi dásis gitta joatkkaskuvlla dássái, čilge Davvi Girjji nubbejođiheaddji

 

Ođđa oahppoplána

Oahppoplánas, mii dál lea gulahallamis ja galgá doaimmas 2020/2021 skuvlajagi rájes, lea deattuhuvvon ahte ohppiin galgá digitála gelbbolašvuohta.

Utsi dadjá dán mearrádusa mearkkašit ahte lágádusas lea munni ovdánahttit eambbo oahpponeavvuid maid digitálalaččat.

– Mii beassat dál ráhkadit eambbo oahpponeavvuid. Oahpponeavvut adnojit sihke deaddiluvvon ja digitála hámis, ja dát mearkkaša ahte mis sáhttet leat lassi teavsttat ja bargobihtát digitálalaččat ovddas guvlui, loahpaha Marit Alette Utsi.

-Almmuhus-