Máhttodepartemeanta dieđiha preassadieđáhusas ahte dán skuvlajagi lohppii eai dárbbaš šat oahppit doavtterduođaštusain dokumenteret jávkama buozanvuođa dihte. Koronavirusa gieđaheapmi dagaha ahte dearvvašvuođabargit fertejit doaibmanávccaid geavahit sidjiide geat dárbbašit dan eanemusat.
– Dearvvašvuođadepartemeanta lea dáhtton ahte oahppit, geat jávket buozanvuođa dihte, eai dárbbaš viežžat doavtterduođaštusa jávkama dokumenteret. Dan ávžžuhusa mii čuovvulit ja ložžet duođaštangáibádusa, dadjá máhtto- ja integrerenministtar Trine Skei Grande.
Rievdadus bistá borgemánu 1. beaivái 2020, jus dearvvašvuođaeiseválddit eai rievdat árvvoštallama mii dagaha ahte láhkarievdadus berre guhkiduvvot dahje oaniduvvot.
