Binges-gilvvu lágideaddjit leat veaháš rievdadan máđija loahpa, ja oasseváldit besset geahččalit veaháš jeaggeeatnama sihkkelastit.
Binges-gilvvu lágideaddjit leat veaháš rievdadan máđija loahpa, ja oasseváldit besset geahččalit veaháš jeaggeeatnama sihkkelastit.
Máze gilisearvi, Mieron gilisearvi ja Binges sihkkelsearvi bovdejit olbmuid meahccesihkkelgilvui viđat geardde Mierona ja Máze gaskkas lávvordaga borgemánu 20. beaivvi.
Sáhttá oasálastit juogo Ymber Lášmmohallin (áigeváldima haga), Binges Gilvvus dahje mánáidgilvvus SeastinBáŋkku1 Mánát.
Eanet hástaleaddji
Gilvvuid jođiheaddji Marit Helene Eira muitala sii leat dán jagi veahá rievdadan gilvoluotta, nu ahte das šaddá veahá gelddoleabbon ja eanet hástaleaddji loahppa ovdal go olle Máze gillái.
– Dál gilvoluodda ii šat čuovo RV93 ja mana Badje-Máze čađa, muhto čuovvu eará luotta vulos Stuoroaivvis.
Fiellobálggis
Eira muitala dat ođđa luodda, mii lea birrasii guokte kilomehtera, rasttilda jeaggeeatnama, gosa biddjojit fiellut bálgá mielde sullii 100 mehtera.
– Dát bálggis gohčoduvvo FeFo-bálggisin, dasgo Finnmárkkuopmodat lea addán doarjaga dán luotta ráhkadeapmái. Gilvoluodda rasttilda RV93 Máze bajit luoddaearu bokte ja joatká oalle ceakko máđidja mielde mii boahtá vulos gillái girku bokte, muitala son.
Sihkarvuođa dihte
Eira lohká sii leat válljen veaháš rievdadit luotta go háliidit oasseváldiide fállat vásáhusa movt doaresbealde meahccesihkkelastin lea.
– Mii maiddái leat dan dahkan sihkarvuođa dihte. Vaikko mis eai leat leamaš lihkuhisvuođat, de doaivut, go rievdadit veaháš máđija, de ii leat nu alla leahttu ja lea sihkkareabbo min oasseváldiide loahpas gilvvu, lohká son.
