Sámediggeválgga listaevttohusaid vuolláičállagiid sáhttá šaddat váttisin sisa addit fysalaččat covid-19 njoammudávdda geažil. Ráđđehus evttoha danne rievdadit sámelága gaskaboddosaččat nu ahte sámediggeválgga 2021 listaevttohusaid vuolláičállagat galget sisasáddejuvvot elektronalaččat.
– Dáinna láhkarievdadusain sihkkarastit ahte listaevttohusaid vuolláičállagat boahtte jagi sámediggeválgii sisasáddejuvvojit dorvvolaš ja sihkkaris vuogi mielde, ja ahte stuoradiggeválgga ja sámediggeválgga listaevttohusat meannuduvvojit dássálaga, dadjá guovllu- ja digitálaministtar Linda Hofstad Helleland preassadieđáhusas.
Čoaggit elektrovnnalaččat
Stuoradiggi mearridii ovdalis dán jagi rievdadit válgalága, mii addá vejolašvuođa čoaggit 2021 stuoradiggeválgga listaevttohusaid vuolláičállagiid elektronalaččat. – Vaikko dilli lea gáibideaddji, de galget válggat čađahuvvot nu go dábálaččat. Láhkarievdadus mearkkaša ahte šaddá álkibun čoaggit vuolláičállagiid sis geat háliidit searvat válggaide ja vuhtiiv áldit njoammunsuodjaleami, dadjá Helleland.
Jorgaluvvot sihke davvisámegillii, julevsámegilli ja lullisámegillii
Válgadirektoráhta ovddasvástádus lea ovddidit digitála čovdosa mii dahká vejolažžan čoaggit vuolláičállagiid. Digitála čoavddus galgá jorgaluvvot sihke davvisámegillii, julevsámegilli ja lullisámegillii.
