Bearjadaga lei prošeavttas vuosttaš čoahkkin, ja álget dál guorahallat movt sáhttet ovddidit sámegiela diggevuogádagas.
Ovdaprošeavttas galget maid gávdnat ovttasbargoguimmiid mat leat áššáiguoskevaččat, vai gártá váldoprošeaktan mas lea mihttu ovdánahttit sámegiela riektegiellan.
Nannet sámi riektesihkarvuođa
Prošeavtta duogáš lea belohahkii dat go sáme- ja eamiálbmotriekti lea vuoruheapmi mas fakultehtas lea áigumuš leat internationála jođiheamis. Barggus galget veahkkin ovdánahttit sámegiela riektegiellan ja juridihkalaš tearpmaid sámegillii, vai sámi álbmoga riektesihkarvuohta nannejuvvo.
Háliidedje viiddis bargojoavkkku
Skábmamánu 8. beaivvi deaivvadii ovdaprošeavtta bargojoavku sunddi luhtte Sis-Finnmárkkus. UiT juridihkalaš fakultehta ruhtada golbma bargi ja guokte masterstudeantta sáhttiba bidjat oasi bargoáiggis ovdánahttit sámegiela riektegiellan.
Mannan vahkku čoahkkimis ledje maiddái duopmostuollohálddahus, Sámediggi, Sámi allaskuvla, justiisadepartemeanta ja muhtin earát mielde, čállá Tromssa árktalaš universitehta (UiT) juridihkalaš fakultehta postdoavttir Kristina Labba preassadieđáhusas.
– Mii oaivvildit ahte buohkaid leat dehálaš oažžut ovttasbargoguoibmin dán prošeavttas, ja sávaimet bovdet buot beliid searvat dan bargui, deattuha Kristina Labba.
