Finnmárkku bivdo- ja guolástussearvi ii hálit Riehpovuona šaddat doapparbáikin. – Lea dehálaš suddjet dan erenoamáš luossanáli, ja mis lea ovddasvástádus dahkat dan, čállá searvi cealkámušas.
Finnmárkku bivdo- ja guolástussearvi ii hálit Riehpovuona šaddat doapparbáikin. – Lea dehálaš suddjet dan erenoamáš luossanáli, ja mis lea ovddasvástádus dahkat dan, čállá searvi cealkámušas.
Finnmárkku bivdo- ja guolástussearvvis lea leamaš jahkečoahkkin, ja sii almmuhit cealkámuša.
Nussir oaččui juovlamánu 2016 lobi Dálkkádat- ja birasdepartemeanttas luoitit ruvkebázahusaid merrii.
Fitnodat oaivvilda doppe leat 70 miljovnna veaikki ruvkkes, mii buktá ruvkedoaimma 30 jagi.
– Dat mielddisbuktá ahte ruvkefitnodat áigu luoitit 2 tonna ruvkebázahusaid Riehpovutnii jahkásaččat. Riehpovuotna lea áitojuvvon mearradorski gođđanbáiki, ja vuonas leat ollu sallihat ja juvssut. Luossajogain mat golget vutnii lea guollevallji, ja luossabivddu áigge bivde birrasii 7 tonna luosa 2016:s, lohká Finnmárkku bivdo- ja guolástussearvi.
Áittan našunála luossavutnii
Finnmárku bivdo- ja guolástussearvi oaidná gurrenlobi áittan našunála luossavutnii.
– Vuona ekovuogádat lea kompleaksa ja rašši. Gurremat váikkuhit ahte mearrabodnái vudjot bázahusat, maiddái gurrenbáikki dobbelis, ja dainna lágiin váikkuha ekovuogádaga olles vuonas. Go vuona dahká ruvkedoaimmaid gurrenbáikin, de ii leat ceavzilis ekovuogádaga geavaheapmi, ja min mielas ii leat dat dohkálaš, cealká bivdo- ja guolástussearvi.
Finnmárkku bivdo- ja guolástussearvi deattuha ahte Riehpovuotna lea našunála luossavuotna.
– Ja stuoradiggi lea ásahan 52 luossačázádaga ja 29 našunála luossavuona vai min deháleamos luossanáliin lea sierra suddjen. Dan genehtalaš erenoamáš luossanáli lea dehálaš gáhttet, ja mis lea erenoamáš ovddasvástádus dahkat dan, čuožžu cealkámušas.
