Hans Ragnar Mathisen lea nammaduvvon Sámi allaskuvlla gudnedáiddárin
Hans Ragnar Mathisen lea nammaduvvon Sámi allaskuvlla gudnedáiddárin
Sámi dáiddár Hans Ragnar Mathisen deavdá 70 jagi suoidnemánu 1.beaivve 2015. Dan oktavuođas Sámi allaskuvla nammadii su allaskuvlla gudnedáiddárin.
Son lea dovddus iežas njuohtamiiguin, grafihkalaš dáidagiiguin, devnnegiiguin ja fotogovaiguin. Son hábmii dáiddalaččat máŋgga
fágagirjji, lea čállán divttaid ja noveallaid ja lea čiŋahan máŋgga almmolaš ásahusa. Son lea hábmen máŋgga sámeguovllu kártta sámegiel báikenamaiguin ja riikarájáid ja eará rájáid haga.
–Addá movtta
Mathisena dáiddalaš bargguin lea stuorra mearkkašupmi máŋgga fágasuorgái mainna Sámi allaskuvla bargá: sámi dáidda, duodji, hábmen/design, sámegiella ja girjjálašvuohta, sámi báikenamat, sámi árbedieđut, historjá ja álgoálbmotmáhttu, čállá allaskuvla preassadieđáhusastis.
Son lea bargan viššalit ja hutkás láhkái sámegiela, -kulturvrra ja álgoálbmotáššiid ovddidit.
Sámi allaskuvlii lea stuorra gudni ahte Elle-Hánsa mieđihii váldit dan gudnedáiddár-namahusa vuostá, – lohká allaskuvlla rektor Jelena Porsanger.
– Ovttasbargu min gudnedáidáriin addá midjiide movtta, inspirašuvnna ja fágalaš ja dáiddalaš doarjaga ovddidit min oahpuid, dutkan- ja eará ovdánahttindoaimmaid.
Hans Ragnar lea bovdejuvvon Sámi allaskuvlla oahppojagi 2015-2016 rahpamii, mii lea Guovdageainnus borgemánu 19.beaivve.
