FeFo bealis eai sáhte dadjat ahte lea ávki unnidit riebanlogu vai rievssatnálli fas laskagoahtá.
Disdaga FeFo álbmotčoahkkimis Guovdageainnus lohke rievssatbivdit dál šaddan nu olu riebaniid, fálliid ja garjjáid, ja jerre ii go FeFo oainne dárbbu rievssathálddašeami oktavuođas unnidišgoahtit daid ja ásahit «riebanskáhta».
– Ii oro ávki
FeFo Leavnnja kantuvrahoavda, Einar Asbjørnsen, muitalii ahte jus sii galget máksit báhččon riebaniid ja eará elliid ovddas, de sáhttá dat nu issoras divrrasin gártat.
Son maid logai ahte das han ii oro ávki.
– Na Iešjávrri guovllus báhcet riebaniid nu olu go nagodit, ja nu maid Várnjárggas. Muhto ii leat nu ahte doppe lea eanet rievssat go eará báikkiin.
– In ipmir manin eai laskka rievssahat. Sáhttá nu ahte rieban ii leat stuorimus rievssatrievvár, logai son.
Dutkat
Son maid lohká ahte dasa ii leat doarvái dutkan leamašan ahte sáhttá dan duođaštit.
Danin ii loga son FeFo bealis dien ortnegii vuos sáhttit njuiket.
– Na sámi árbemáhtu bokte de dihtet sápmelaččat ahte go lea sáhpánjahki, de lea eambbo rievssat, muhto de nuppe jagi fas eanet rieban ja de maid unnit rievssat fas. Ii go dat muital ahte rieban lea monnesuola?
– Mii diehtit ahte rieban váldá moniid, muhto nu go namuhin, de eat vuohte makkárge lassáneami rievssahiin Várnjárgga ja Iešjávrri guovllus.
– Jáhkán baicca dat eará monnesuollagat, nu go fállit, garjját, ja eará eallit leat stuorit sivalaččat, lohká Asbjørnsen, ja čilge maid oaivvilda:
– Jus mat boazoráppiid geasehivčče eret meahcis, de soaittáše maid unnut riebanat, garjját ja eará eallit mat ellet ráppiin maid boraspiret leat goddán. Muhto dasa galggašii eambbo dutkan vuos, logái son vel loahpas.
