Konsearta lea rabas ja nuvttá buohkaide geat dorjot Fovsen-ášši.
– Sávašin ahte in goassige livčče dárbbašan dakkár konseartta lágidit. Dieđus mielas lágidan dan. Dat gižžu lei áigá jo galgat loahpahuvvon, muhto dás mii leat. Bearjadaga áigut mii gudnejahttit ja doarjut Fovssen-aksunisttaid, Fovsen-Njaarke boazodolliid ja sámi vuoiŋŋa, dadjá Riddu Riđu festiválajođiheaddji, Sajje Solbakk preassadieđu bokte.
Duođaštit ahte doarjjakonsertii servet earet eará Mari Boine, Agnete Saba, Sara Marielle Gaup Beaska, Máret Áile Gaup Beaska, ÅVLA, Marja Mortensson.
Konsearta lágiduvvo Riikalávddis njukčamánu goalmmát beaivvi diibmu 19.00.
Konseartta lágideami duohken muđui leat Márkomeannu, Riikalávddi, Sámiráđđi, Várdobáiki, Oslo Sámi viessu, Saemien Sijte, Dáiddadállu, Tjaktjen Tjåangkoeh, Raasten Rastah, Davvi álbmogiid guovddáš ja NKA – Norske kulturarrangører.
Iežas Instagram-siiddus Riddu Riđđu dieđiha konseartta oktavuođas ná:
– Oslo! Bearjadaga mii gudnejahttit Fovsen-sápmelaččaid, min duostilis nuoraid ja sámi vuoiŋŋa!
