-Almmuhus-
OĐĐASATRiddu Riđđus maid iežaset vuola

Riddu Riđđus maid iežaset vuola

-

-

Riddu Riđđu feastivála čalmmustahttet feastivála 25 jagi báikkálaš buvttaduvvon vuollagiin. Ávvir lea árvvoštallan vuollaga.

Riddu Riđđu borramuš ja juhkamušhoavda Mats Sundby muitala sii galge gávnnahit juoidá movt čalmmustahttet ahte feastivála lea 25 jagi. Sii smihtte ahte dáppe davvin leat máŋga mikrovuolavuoššahaga, ja Riddu Riđđu atnáge hui árvvus ávkkástallat báikkálaš návccaiguin ja buktagiiguin.

– Mii de finaimet Lauvanger vuolavuoššahagas máistime, ja geahččaleimmet gávcci iešguđetlágan sorta ja válljiimet dan maid liikomet buoremusat ja orui vuola mii ovddasta Riddu Riđđu, lohká Sundby.

 

Báikkálaš šattuin dáhkkon

Riddu vuollaga namma lea Njálggis, ja dat lea «pale ale». Vuola lea ráhkaduvvon varas rásiin ja šattuin mat šaddet davvi Norggas.

– Vuola lea inspirerejuvvon Amerika vuollagis, mas lea ollu sitrus ja hombil, lohká Sundby.

(Ášši joatka gova vuolabealde)


Riddu Riđđus guossohit ávvuvuollaga feastivála 25 jagi ávvudeami oktavuođas. Govven: Ovlla Gaup

Eai diehtán ovdagihtii

Sii leat diŋgon dušše 1000 vuollaga, ja plána lea ahte dat ii vuvdo earágo feastivála oktavuođas dán jagi. Sundby muitala sii eai leat ollen márkanfievrridit vuollaga ovdagihtii, nu ahte eanaš guossit eai diehtán maidege ahte Riddu Riđđus lei iežaset vuola.

– Olbmot fuomášedje vuollaga ja sii šadde dieđusge sáhkkidat ja vuola lea hui bures váldon vuostái, lohká son.

 

Seamma go márffiin

Sundby muitala lea sullásaš nu movt šattai Riddumárffiin mii bođii moadde jagi áigi, maid galge dušše ovtta jagi vuovdit.

– Dat váldui issoras bures vuostái, ja vuvdojuvvo dál fásta feastivála oktavuođas, lohká son.

 

Soaitá jahkásaččat

Sundby lohká sii leat juo jurddašan ahte galgat oažžot iežamet vuollaga mii galgá vuvdot juohke jagi, muhto eat leat vel mearridan maidege das.

– Mii oaidnit maŋŋel feastivála go árvvoštallat movt lea mannan vuollagiin, lohká son.

 

Ávvira árvvoštallan:  Vuola lea sevdnjes vuola, mas lea erenoamáš máhku. Das dovdo bures sitrus ja sáhttá gohčodit dan suvrra vuollagin. Vuola hirpmáhuhtti go lei dan mađe njalggat leahkit sevdnjes vuola. Vuollaga lei hui alki juhkat ja ii lean obanassiige álbmái ja dat guossohuvvo hui bovdejeaddji bohttalis.

 

 

-Almmuhus-