-Almmuhus-
-Almmuhus-
OĐĐASAT Riddu Riđđu joatká vaikko festiválas lea duođaštuvvon korona

Riddu Riđđu joatká vaikko festiválas lea duođaštuvvon korona

-

-

Riddu Riđđu stivrras lea leamaš čoahkkin Gáivuona suohkandoavttirin.  Suohkandoavttir ii ávžžut festivála giddet doaluid.

Riddu Riđu festiválajođiheaddji Sandra Marie West ja Riddu Riđu stivrajođiheaddji Bente Ovevie Skogvang bovdiiga preassakonferensii lávvardaga diibmu 1605. 

Dalle lei áiddo Riddu Riđu stivra čoahkkinastán Gáivuona suohkandoavttirin Anita Moen Pedersenin. Guoktásis lea duođaštuvvon covid-19 Riddu Riđus odne. Soai eaba leat lagas oktavuođat ja soai eaba leat leamaš festiválabáikkis odne.

Negatiiva ikte

– Goappašagat iskkaduvvuiga maiddái ikte. Dalle ii duođaštuvvon sudnos covid-19. Odne eaba leat leamaš festiválabáikkis. Stivračoahkkimis mearrideimmet čuovvut suohkandoaktára rávvagiid. Suohkandoavttir lea maid Álbmotinstituhtas jearran rávvagiid. Ráva lea ahte eat šluhtte doaluid, muhto dáppe šaddet dál garra koronagáržžidusat, čilge Skogvang.

Guovtti Riddu Riđu festivála bargiin dat lea duođaštuvvon covid-19 jođánit iskosis. Dál leat čađaheame njoammunguorrama ja máŋggas leat juo erremis. 

– Dál leat buohkat geatnegahtton geavahit njálbmesuoji. Daid mii juohkigoahtit buot festivála gussiide. Mehter gaska ja bassat gieđaid lea erenoamáš dehálaš dál. Maiddái antibacain doidit gieđaid lea dehálaš eastadeapmi dál, lohká Skogvang.

Čavge njuolggadusaid

Riddu Riđđu gidde iežas gávppiid ja kioska go dárbbašit buot eaktodáhtolaš vehkiid njoammueastadandoaimmaide. 

– Dál šaddá maid nuvttá biilla guođđit min biilašilljui. Mii maid doalahit lagas oktavuođa politiijain, singuin geat barget gearggusvuođain dáppe, eaktodáhtolaš bargiiguin ja nu ain.

Stivrajođiheaddji deattuha ahte sii leat leamaš gearggus dása ja nagodit dán eastadanbarggu čađahit. 

– Ii leat vuordemeahttun ahte korona duođaštuvvo sajis gos leat 500 olbmo. Ii leat veaháge vuordemeahttun dat. 

Suohkandoaktára hálddus

Makkár korona variánta lea duođaštuvvon lea ain eahpesihkar. Suohkandoavttir lea váldán badjelasas barggu dáid guorahallat. Bargi guovttos leaba jođánit iskosa čađahan. Máŋgii lea čájehuvvon ahte jođánis iskosat sáhttet čájehit boasttu bohtosa. Dan eai dáhto Riddu Riđu jođiheaddji árvvoštallat.

– Juo dávjá sáhttá nu, muhto dan eat dáhto mii árvvoštallat. Mii leat čuvvon dan maid suohkandoavttir lea rávven. Go iskkus lea positiiva, de lea suohkan dearvvašvuohta mii váldá badjelasat. Sudnos váldo bures vára, lohká Skogvang.

Riddu Riđu jođiheapmi dáhttu dál suddjet artisttaid ja plánejit movt konsearttat galget čađahuvvot eahkedis. 

-Almmuhus-