– Bargiidbellodaga sámediggejoavkkus lea prinsihppan ahte mearraresurssaid ávkkástallan galgá váikkuhit ássamii riddogáttiin ja vuonain, dadjá sámediggeáirras Ronny Wilhelmsen preassadieđáhusastis.
– Bargiidbellodaga sámediggejoavkkus lea prinsihppan ahte mearraresurssaid ávkkástallan galgá váikkuhit ássamii riddogáttiin ja vuonain, dadjá sámediggeáirras Ronny Wilhelmsen preassadieđáhusastis.
Bargiidbellodaga sámediggejoavku čállá ahte lea čielga ovdáneapmi leamašan guolástusealáhusa muddemiin maŋemus jagiid.
Guolástan- ja bivdoearit leat sirdon riddo- ja vuotnafatnasiin áhpebivdofatnasiidda.
Dát lea mielddisbuktán ahte earit leat čohkkejuvvon dađistaga unnit fanaslohkui, ja feastonuohttefatnasiin dáhpáhuvvá eanas oassi guollereidemis, čuoččuhit sii.
– Eriid čohkken maiddái mielddisbuktá ahte vuostáiváldinrusttegiid lohku unnu ja rusttegat guovdduštuvvojit, dadjá sámediggeáirras Ronny Wilhelmsen.
Vuoruheapmi
Bargiidbellodaga sámediggejoavku oaidná ahte feastonuohttefatnasat eai deavdde iežaset geatnegasvuođaid buktit guliid gáddái, ja gáibidit danin ahte feastonuohttefanasearit áiggi badjel váldojuvvojit ruovttoluotta vai eará fanasjoavkkut sáhttet váldit badjelasas eriid.
– Mii oaidnit ahte earit bures sáhtáše juhkkojuvvot Davvi-Norgga riddofatnasiidda, ja dalle berre earenoamážit vuoruhit fatnasiid mat leat vuollel 15 mehtera, lohká Wilhelmsen.
Liigeváikkuhusat
– Bargiidbellodat doarju sin geat háliidit bisuhit riddo- ja vuotnafatnasiid. Mii oaivvildit ahte dát buktá stuorámus liigeváikkuhusaid báikkálaš ja guvllolaš árvoháhkama bokte, loahpaha sámediggeáirras Ronny Wilhelmsen.
