-Almmuhus-
OĐĐASAT– Resursa­vátnivuohta áitá sámi skuvlla

– Resursa­vátnivuohta áitá sámi skuvlla

-

-

Dál lea áigi ahte sihke ráđđehus ja Sámediggi váldet duođas sámi skuvlla, gáibidit Skuvllaid riikalihttu ja NetSam.

– Dát ášši berrešii hoahppoáššin ovddasvástideaddji eiseválddiide. Oahpponeavvováilevašvuohta lea hui guovddaš fáddá sámi skuvllain, dan leat mii ovddidan ságastallamiin Sámedikkiin juo 2013 rájes. Unnán dáhpáhuvvá, maŋŋel fágaođasteami ásaheami 2020:s go ođđa oahppoplánat váldojuvvojedje atnui, de eai lean liikká ođastuvvon oahpponeavvut, dadja Inger Anne Gaup, NetSam Álttá jođiheaddji preassadieđáhusas.

Son dadjá ahte nu go dál lea dilli, de fertejit oahpaheaddjit ieža ráhkadit oahppomateriálaid dađistaga go oahpahit. Muhtin fágain fertejit oahpaheaddjit atnit oahpponeavvuid mat leat 1990-logu rájes.

– Nu ii galgga leat. Dat čuohcá sihke sámi skuvllaid rekrutteremii, ja maiddái ohppiid oahppodillái, dadja Gaup ja čujuha dasa ahte Sámedikkis lea ovddasvástádus ráhkadit sámi oahpponeavvuid sihke davvi-, lulli- ja julevsámegillii.

– Dál fertejit váldit sámi oahpahusa duođalaččat

NetSam Doarju Skuvllaid riikkalihtu mii gáibida ahte sámi oahpponeavvut galget nannejuvvot lágalaččat.

Berit Ellen Skum, Guovdageainnu kulturskuvlla jođiheaddji ja Skuvllaid riikkalihtu váldoluohttámušolmmoš ovddas suohkanis, gáibida ahte ráđđehus ja Sámediggi váldet ovddasvástádusa ja juolludit doarjaga vai sámi oahppit ožžot daid oahpponeavvuid ja oahpahusa maidda lea riekti.

– Dál ferte Støre-ráđđehus váldit sámi oahpahusa duođalaččat.  Leat leamaš juo olu váruhusat, máŋggaid jagiid. Maiddái Riikarevišuvdna lea cuiggodan go sámi oahpahus ii leat doarvái buorre. Duohtavuohta lea ahte sámi oahpahus goarrana, go ii oktage áiggo váldit ollislaš ovddasvástádusa, dadja Skum.

– Skuvllaid riikkalihtus lea dát ášši hui guovddážis, go dat duođai čuohcá sin miellahtuide sámi skuvllain, deattuha Skum.

RÁĐĐELAHTTU: Mikkel Eskil Mikkelsen sávvá ahte lihkostuvvet bargguin. Govva: Marit Elin Kemi
RÁĐĐELAHTTU: Mikkel Eskil Mikkelsen sávvá ahte lihkostuvvet bargguin. Govva: Marit Elin Kemi

Ovttaoaivilis

– Mun lean áibbas ovttaoaivilis ahte lea stuora dárbu sámi skuvllas, muitala ráđđelahttu Sámedikkis Mikkel Eskil Mikkelsen.

Mikkelsen vuordá ahte dál, go oahpahusláhka rievdá ja go bidjet návccaid sámegiellaloktemii maid ráđđehus lea gáibidan, ahte šaddet albma ja buori doaibmabijut mat sihkkarastet sámi mánáid skuvlabeivviid ja rievtti.

– Maiddái ahte lea boahtteáigi sámegielas. Dutkan čájeha ahte sámegielas lea 60 proseantta heaitin, ja dat čájeha ahte jos mii joatkit nu go dál, de unnu davvisámegiela hálliid lohku 65 proseanttain. Lea duođalaš dilli.

Son muitala ahte Sámediggi lea juste dál bargamin ja ráđđádallamin oahpahuslágain, ja sus leat stuorra vuordámušat dasa.

– Mis lei dievasčoahkkimis stuora ášši sámi mánáid sosiála ja fágalaš birgema birra gieđahallama vuolde. Leat bidjamin stuora návccaid dasa. Sávan ahte mii lihkostuvvat ja ahte ráđđehus oaidná sámi mánáid dárbbuid, loahpaha Mikkelsen.

-Almmuhus-