-Almmuhus-
-Almmuhus-
-Almmuhus-
OĐĐASATResistánta baktearat čuvvot koaffara ruoktot

Resistánta baktearat čuvvot koaffara ruoktot

-

-

Oallugiin geat leat leamašan olgoriikkas, ja leat šaddan buohcciviesus fitnat, sáhttet leat antibiotikaresistánta baktearat, nu ahte eai ieža dieđe ge dan.

Sáhttá leat hui váttis fuobmát leat go baktearat njommon ja dain sáhttá maid hui váttis beassat eret, muitala UiT ja UNNa professor ja váldodoavttir Arnfinn Sundsfjord.

Davvi-Norgga Universitehtabuohcciviesu (UNN), Vestre Viken buohcciviesu ja Akershusa universitehtabuohcciviesu dutkit leat golbma jagi dutkan antibiotihkaresistánta bakteriijaid norgalaččain geat leat leamašan olgoriikkas. Iskosis ledje 101 pasieantta main lei cissadávda mii bođii resistánsa e.coli-baktearas.

Jagi maŋŋel go dutkan álggii, lei 50 proseanttas dain pasieanttain resistánta bakteara ain gorudis. Golbma jagi maŋŋel lei 15 proseanttas ain bakteara gorudis.

 

Váldit mielde resistánta bakteriijaid olgoriikkas

Pasieanttat mat ledje mielde iskosis ledje olu mátkkoštan dan maŋemus jagi ovdal iskkus álggahuvvui.

– Lea earenoamáš bahá oažžut resistánta baktearaid jus leat buohccán mátkkis ja šaddan orrut buohcciviesus. Earenoamážit jus leat leamašan India-guovlluin, muitala Arnfinn Sundsfjord.

 

Čiehkada

Antibiotikaresistánta baktearat sáhttet čiehkádit čoliid sisa ja doppe laskat.

Sundsfjord muitala ahte leat oallugat mat eai buohccá dáid baktearaid dihte, ja nu leat oallugat mat eai oba fuomáš ge ahte sidjiide leat njommon dat.

 

Ii leat ávki

Jus leat njommon antibiotihkaresistánta baktearat de ii leat nu álki dain beassat eret. Dábálaš antibiotikas ii leat ávki.

– Ii leat doarvái dábálaš antiobiotikadálkkodemiin dálkkodit pasientta mas leat antibiotikaresistánta baktearat. Ferte eará vugiin daid dálkkodit, muitala prošeaktajođiheaddji Pål A. Jenum.

 

Njommot johtilit

Pasieanttat main leat antibiotehkaresistánta baktearat fertejit hui garra njoammunsuddjennjuolggadusaid čuovvut go bohtet buohccivissui, ja galggašii maid dan dáhkat ruovttus ja eará báikkiin.

– Jus pasienttii leat njommon antibiotihkaresistánta baktearat, de leat sus árvideamis maid gullevaš mikrobat gorudis. Ovdal go leat áibbas sihkkarat leat go pasieanttas dat baktearat, de ferte son biddjot isoláhtii vuoi ii njoammut earáid, muitala Jenum.

– Lea dehálaš bassat gieđaid vuoi ii njoammut earáid, muitala Sundsfjord.

-Almmuhus-