Leavnnja Rema 1000 buvda, Porsáŋggus, bulii gutnan mannan ija.
Leavnnja Rema 1000 buvda, Porsáŋggus, bulii gutnan mannan ija.
– Bearjadaga čuovganeapmái, tiibmu 00:30, oaččui politiija dieđu ahte REMA 1000 buvda Leavnnjas Porsáŋggu gielddas lea buollimin, muitala Oarje-Finnmárkku politiija operašuvdnajođiheaddji Andreas Haugaasen Hámmárfeasttas.
Eai dieđe vuos manne buollái
Haugaasen ii loga vuos diehtet siva manin buvda buollái.
– Tiibmu 04:10 oaččuimet dieđu buollinčáskadanveagas ahte dál ledje nagodan bissehit buollinleavvama. Mii leat dál dutkamin ášši ja leat álggahan teknihkalaš iskamiid das. Eat leat dássážii vuohttán maidege ahte muhtin galggašii cahkkehan buvdda, čilge operašuvdnajođiheaddji Andreas Haugaasen.
Su dieđu mielde ii leat oktage olmmoš roasmmehuvvan ja buvda galgá buollán gutnan.
Ollásit buollemin
Leavnnjas muitala politiija báikkálaš operašuvdnajođiheaddji Sverre André Opdahl NRK:i ahte go sii bohte báikái, de lei buvda ollásit buollimin.
Maiddái dollačáskadeaddjit bohte seamma áiggi báikái ja vižže eret moadde gássabohttala mat livčče sáhttán bávkkehit.
Opdahl dieđu mielde eai lean olbmot buvddas go buollái ja muitalii politiijaid áigut maid hállat vihtaniiguin.
Ságat aviisa čállá ahte oktiibuot ledje 30 dollačáskadeaddji sajis go ožžo veahki Avinor dollačáskadeddjiin ja Kárášjoga dollačáskadeddjiin.
Balle leavvat
Buollinfákta Svein Skogen muitala sii gerge jáddadit buollima njealji – viđa áiggi iđđedis.
Ovtta gaskka balle buollima leavvat kránnjábuvddaide, muhto nagodedje bissehit buollima ovdal go vahágahtii daid. Skogen navdá lagamus buvddain Kvadraten oastinguovddážis leat suovvavahágat, muhto dan áigo sii dárkkistit lagamus áiggis.
Skogen muitala sis leat guokte albmá fáktemin báikkis amas ii buollá.
