Finnmárkku, Romssa ja Nordlándda fylkkanjunnošat reagerejit garrasit ođđa regiovdnajuohkima evttohussii, mii dál lea ožžon eanetlogu Stuoradikkis.
Finnmárkku, Romssa ja Nordlándda fylkkanjunnošat reagerejit garrasit ođđa regiovdnajuohkima evttohussii, mii dál lea ožžon eanetlogu Stuoradikkis.
– Eahpelogihkalaš ja eahpedemokráhtalaš, oaivvilda Finnmárkku fylkkasátnejođiheaddji Runar Sjåstad, Romssa fylkkaráđi jođiheaddji Cecilie Myrseth ja Nordlándda fylkkaráđi jođiheaddji Tomas Norvoll.
Golmma fylkkas guovtti fylkii
Ođđa regiovdnakárttas šaddá Davvi-Norga juhkkojuvvot guovtti regiovdnii, dálá golmma fylkka ektui, juoga mii dagaha unnán čanastemiid álbmogis, oaivvildit fylkkanjunnošat.
– Manne áigot dat njeallje bellodaga rievdadusaid Davvi-Norggas, go Møre ja Romsdal ja Rogalánda galget bissut. Sii eai nagot ieža ge lohkat maid áigot Davvi-Norggain, lohká Myrseth.
Dat golbma fylkkajođiheaddji bivdet ráđđehusa leat čielgaseabbon maid reforbma sisttisdoallá, ja oaivvildit ráđđehus leat álggahan heajos proseassa.
Dušše gaskaneassoahpamuš
Ii Olgeš iige Ovddádusbellodat čiegat ahte háliidit bálkestit olles fylkadási ja atnit dušše guokte hálddašandási, dan sadjái go golbma. Regiovdnafoarbma lea gaskaneassoahpamuš ovttasbargoguimmiiguin, dovddastii suohkanlašlávdegotti jođiheaddji, Ovddádusbellodaga Helge André Njåstad NTB:i go reforbma ovdanbuktojuvvui gaskavahkku.
Unnán váldesirdin
Dat golbma fylkanjunnoša davvin reagerejit maid dasa go evttohusas lea hui unnán váldesirdin regiovnnaide. Sii cuiggodit ahte fylkkat leat juo massán doaimmaid ráđđehusa ruhtačuohppamiin mat galget regiovnnaid ovdáneapmái.
– Dasa lassin leat unnán ođđa doaibmamušat dán reforpmas, deattuha Cecilie Myrseth.
(©NTB)
