Elliide sáhttet garra jienat ja čuovggat ođđabeairuohta šaddat issoras vásáhussan. Jus bures ráhkkana, de sáhttá buoridit ođđajagiávvudeami sihke eallái ja eaiggádii.
Elliide sáhttet garra jienat ja čuovggat ođđabeairuohta šaddat issoras vásáhussan. Jus bures ráhkkana, de sáhttá buoridit ođđajagiávvudeami sihke eallái ja eaiggádii.
– Mii oaidnit ahte beatnagat ja bussát leat viggan gáskit ja gazzut uvssaid čađa, gárpmaid, stuoluid ja láhttiid, ja šaddet ieža buot varran. Suorganan eallit sáhttet roasmmohuhttit iežaset, muitala Norgga veterinearasearvvi presideanta Torill Moseng TV2i.
Sáhttá ipmirdit boastut
Eai leat buot eallit mat ballájit bávkkanasaiguin, muhto soames eallit sáhttet hirbmosit ballát. Moseng buktá rávvagiid sidjiide geain leat eallit. Vuosttažettiin berre ieš eaiggát láhttet nu go dábálaččat, ja fitnat olgun ja biebmat beatnaga nu go muđuid láve. Maiddái go bávká buot eanemusat, de berre láhttet nu go dábálaččat.
– Jus mii viggat dahkat nu go mánáiguin, ja jeđđet, de doaivu beana ahte eaiggát lea balus ja ahte lea várálaš dilli. Dat lea várra stuorámus boasttuvuohta maid eaiggát dahká, dadjá Moseng.
Ii ábut leat okto
Gávdnojit ollu ráđit ja prográmmat mat sáhttet leat ávkin elliide go galget hárjánit issoras jienaide. Dasa lassin gávdnojit maid dálkasat mat jaskkodahttet elliid. Dalle gal ferte gulahallan šibitdoaktáriin álggos.
Vaikko movt eaiggát čoavdá dili, de lea buot deháleamos ahte ealli ii leat okto go diibmu coahkká ođđajagi guvlui.
(©NTB)
