Birrasii bealli buot náittosdiliin loahpahuvvojit earránemiin ja juovlabasit sáhttet leat váddásat earránan váhnemiidda. Juovllat leat mánáid basit ja ollesolbmuid dárbbut fertejit vuordit.
Bufetáhta bearašsuodjalusa bokte lea ráhkadan pláhkáha «Juovlarávvagat earránan váhnemiidda» mo galgga meannudit juovlabasuheami go lea oktasaš mánná, muhto eai ása ovttas, čállet preassadieđáhusas.
– Dehálamos lea muitit ahte juovllat leat mánáid basiid. Dalle ferte jurddašit mii lea dehálamos mánáide, lohká Mussira Bearašsuodjalusa bearašterapevta ja jođiheaddji, Lise Olderskog.
Statistihkalaš Guovddášdoaimmahaga logut čájehit ahte juohke jagi vásihit 20 000 Norgga máná ahte váhnemat earránit ja fárrejit nuppi sadjái. Olu váhnemat rahčet ráhkadit ilolaš juovlabasuhemiid ja vuosttaš juovllat maŋŋá earráneami lea losimus.
– Váhnemat fertejit dattetge geahččalit duvdit eret riidduid gaskaneaset. Jus oktasaš juovlabasuheamit galget doaibmat, de ávžžuhat mii sin vuđolaččat smiehttat nagodit go sii dan dahkat. Jus basuhat juovllaid okto, fertet sihkkarastit ahte mánáin lea buorre dilli, lohká Olderskog.
Juovlarávvagat earránan váhnemiidda:
- · Juovllat leat mánáid basit.
- · Smiehta mii lea dehálamos mánáide, ii ge alccet.
- · Oktasaš basuheapmi? Bisset riiddu dan boddii.
- · Basuhit okto? Smiehtas vuđolaččat nagodat go ieš dan dahkat.
- · Juovlabasiid áiggi ii leat áigi ođđa irggi/moarsi mánáide oahpásmahttit. Berre leat hui várrugas dan dahkat ovdal go oainnát dohkkehit go mánát su.
- · Bruvssa, ii ge alkohola. Mánát loktet buoremusat go váhnemat láhttejit nu mo lávejit go leat čilgosat.
