Vuosttaš rávva lea ahte galgá váldit vuhtii bohccuid go vánddardat guohtunguovlluin.
– Nu movt earáin leat várrenjuolggadusat, de berrešit buohkat geat bivdet guohtunguovlluin čuovvut rávvagiid boazodoalu ektui, čállá FeFo.
Čakčamánu 1. beaivvi álggii ealgabivdu Kárášjoga gielddas ja Guovdageaidnu suohkanis, muđuid Finnmárkkus álgá ealgabivdu dán mánu 25. beaivvi. Smávvafuođđobivdu álgá čakčamánu 10. beaivvi. Seammás lea nu ahte ollu orohagat leat dál álgán johtit čakčaeatnamiidda. Finnmárkkuopmodat (FeFo) lea ráhkadan rávvagiid maid ávžžuhit bivdiid čuovvut.
– Mii hálddašit buoremusat buohkaide Finnmárkkus, ja erenoamážit boazodoalu vuođul. Danne lea FeFo, Norgga bivdo- ja guolástansearvi (NJFF), NJFF Finnmárku, Oarje-Finnmárkku loddebeanasearvi ja Norgga Boazosápmelaččaid Riikasearvi (NRL) ovttas ráhkadan njuolggadusaid, muitala FeFo meahcceossodaga jođiheaddji Einar J. Asbjørnsen.
Rávvagat:
– Váldde vuhtii veaddingeatnegasvuođamearrádusaid.
– Oahpásnuva báikkálaš beanaláhkanjuolggadusaide.
– Go fuomášat bohccuid, čuorvvo beatnaga iežat lusa, bija báddái jus lea dárbbašlaš ja váldde vuhtii bohccuid.
– Vuhttojit go bohccot? Leage áicil – guovllus leat bohccot.
– Oainnát go ovtta bohcco? Leage áicil – doppe leat jáhkkimis eanet bohccot lahkosis.
– Oahpa dan boazodoalu birra mii lea dan guovllus gos don vánddardat.
– Daga juoidá vai du beana ii beroš bohccuin.
– Govčča verráha jus leat ieš rahpan dan.
– Dieđit politiijaide tlf. bokte 02800 jus fuomášat lápmahuvvan dahje jápmán bohcco.
– Váldde oktavuođa Romssa ja Finnmárkku stáhtahálddašeddjiin tlf. bokte 78 95 03 00 oažžun dihte eanet dieđuid boazodoalu birra.
Gáldu: FeFo
Sadji buohkaide
Sullii 80 proseantta Finnmárkkuopmodaga eatnamiin lea bohccuid guohtunguovllu.
– Finnmárkkuopmodat lea viiddis ja mis lea sadji sihke bivdiide, beatnagiidde ja boazodollui. Jus bivdit čuvvot njuolggadusaid, de jáhkán mis buohkain šaddá fiinna čakča, loahpaha Einar J. Asbjørnsen.
