-Almmuhus-
OĐĐASAT– Ravkečuovga dehálaš oassi oadjebas johtolagas

– Ravkečuovga dehálaš oassi oadjebas johtolagas

-

-

Norgga biilavuoddjit eai leat doarvái čeahpit geavahit ravkečuovgga, dat sáhttá heaggavárálaš. – Dás meddet oallugat, lohká Bård Morten Johansen Trygg Trafikkas.

Geasset dáhpáhuvvet buot eanemus lihkohisvuođat Norggas.

Trygg Trafikk seniorráđđeaddi Bård Morten Johansen ávžžuha olbmuid geavahit ravkečuovgga go leat vuodjime.

– Dat lea áidna vuohki movt sáhtát eará biilavuddjiide muitalit guđe guvlui leat manname. Mii leat beare čuorbbit geavahit dan, ja livččii sáhttán garvit olu lihkohisvuođaid jus beare livčče geavahan ravkečuovgga nu go galgá, lohká son Trygg Trafikk preassadieđáhusas.

 

Várálaš dilálašvuođat

– Lea dábálaš geasseáiggi ahte biila mohkasta eret luottas, muhto ii muitte ravkečuovgga geavahit. Jurddaš mat jus ieš boađát vuoji, ja biila mii lea ovdalis fáhkka goazasta ja mohkasta eret luottas. Jus biilavuoddji livččii ravkečuovgga bidjan ala moadde sekundda ovdal, de livččii maŋit biila ollen unnidit leahtu, čilge Johansen.

– Nubbi hui varalaš dilálašvuohta lea jus váldoluottas galggat gurut guvlui, ja leat biillat maŋis. Muhto ovdal go beasat mohkastit gurut guvlui, fertet vuordit dassážii go ovddalboahtti biillat vudjet meattá. De lea várálaš, ja biila mii lea maŋis sáhttá vuodjit njeaiga. Jus lea guorbmebiila maŋis, de ferte vel árabut addit dieđu, vai lea sihkar ahte vuoddji lea oaidnán, lohká Johansen.

 

«Smávva áššážat»

Trygg Trafikk cealká ahte dákkár smávva áššážat leat dehálaš oasit oadjebas johtolagas.

– Várut leahtu, leage vuoŋis ja geavat ravkečuovgga. Jus buohkat dan dagaše, de eai livčče liikká olu lihkohisvuođat geasset, loahpaha Bård Morten Johansen.

-Almmuhus-