Rámálmas buorre luossaáigodat

Finnmárkku stuorámus FeFo-jogaid logut leat dál gárvásat. Dán jagi luossaáigodat lei gelddolaš dan maŋŋit giđa geažil, muhto goittotge leat olu jogain goddán olu guliid. Lea earenoamážit luossajogain nuorttabealde fylkkas gos lea goddon olu luossa.

Rámálmas buorre áigodat

– Dán jagi bohtosat čájehit earret eará ahte Ánnejogas lea leamaš rámálmas buorre áigodat, ja lea stuorámus FeFo-johka Finnmárkkus mas lea bivdoolahus guokte jagi maŋŋálaga, lohká meahccehálddašeaddji Steinar Normann Christensen preassadieđáhusas.

Son čujuha ahte dan jogas šattai olahus sihke kiloid ja logu dáfus. Eará jogat gos dán jagi ledje olahusat ledje Ráhkojohka, Gállojohka ja Suovvejohka.

Alit deaddu

Olu eará jogaid sálašlogut duođaš­tit maiddái ahte 2017-áigodat šattai stuorraluossajahkin (goadjinjahkin). Vaikko Leavdnjajogas leage leamaš gaskamearálaš áigodat, dettii juohke nubbi luossa maid godde, 52 proseantta, badjel čieža kilo. Mannan jagi lei oassi 46 proseantta.

Ollu stuora luosat

Riehpovuonjogas lea leamaš veahá vuollel gaskamearálaš áigodat, muhto maiddái dáppe leat goddán olu stuorraluosaid (goadjimiid). Juo beallemuttus bivddus fidne­jedje dáppe eambbo stuorraluosaid go olles 2016-áigodagas.

 – Leamaš buorre ovdáneapmi áiggi mielde, masa lea vuosttažettiin buorre ja nanu bargu maid čeahpes ja ulbmilolaheaddji lihttoláigoheaddjit leat dahkan ja buorre ja guhkesáigásaš hálddašeapmi, dadjá Christensen.

Dieđihit ain sállašiid, muhto vásáhusaid mielde eai buvttit dat stuorra erohusaid stuorra jogaid dáfus.

Daid oktanuppelohkái stuorámus FeFo-jogaid čoahkkáigeassu lea ná:

• Suovvejohka: 2.345 kg.

2016:s lei olahus sihke logu ja kiloid dáfus. Dan jagi lea dan rádjái raporterejuvvon okta guolli unnit, muhto šattai ođđa olahus kiloid dáfus. Lea hui jáhkehahtti ahte dat mearkkaša ahte šaddá ođđa olahus maiddái man luossalogu dáfus. Leat goddon golbma stuorraluossa (goadjima) unnit, muhto olu eanet gaskamutto luosat.

• Bissojohka: 1.330 kg.

Bealli diimmá jagis ja olu vuollel gaskameari.

• Lággu: 3.492 kg.

Gaskamearálaš áigodat vaikko bivdu álggiige hui maŋŋit go lei maŋŋit giđđa.

• Leavdnjajohka: 8.391 kg.

Gaskamearálaš áigodat, muhto buorre stuorraluossaáigodat (goadjináigodat), mas sullii 52 % goddon luosain leat stuorraluosat (goadjimat) mat deddet 7 kilo dahje eambbo. 2016:s lei lohku 46 proseantta.

• Riehpovuonjohka: 7.497 kg.

Veahá vuollel gaskameari, muhto olu stuorraluosat (goadjimat).

• Dávatjohka: 1.222 kg.

Buorre áigodat, muhto bisánii bivddu vuolde, ja loahpas šattai vuollel olahusa.

• Gállojohka: 1.507 kg.

Buorre áigodat ođđa olahusain kiloid dáfus.

• Rávttošjohka: 2.591 kg.

Áigodat lea leamaš vuollel gaskameari, muhto stuorraluosaid (goadjimiid) oassi lei buorre.

• Morešveaijohka: 3.516 kg.

Gaskamearálaš áigodat, muhto olu stuorraluosat (goadjimat).

• Ráhkojohka: 1.826 kg.

Buorre áigodat mas lei olahusa kiloid dáfus. Leat leamaš hui olu stuorraluosat (goadjimat).

• Ánnejohka: 14.607 kg.

Hui buorre áigodat, mii ledje olahusat sihke deattu ja guollelogu dáfus. Olu stuorraluosat.

Alit lihttoláigohandivat

Dán jagi bohtosat čájehit ahte Suovvejogas šattai bivdoolahus goalmmát jagi maŋŋálaga. Maiddái Ánnejogas lea leamaš buorre ovdáneapmi, go ledje kiloolahusat maiddái 2014:s ja 2016:s. 2015:s lei jogas olahus luossalogu dáfus.

Dasa lassin ledje 2015:s ja 2016:s olahusat olu smávit jogain, maid sálašlogut gárvánit easkka golggotmánus. FeFo-jogaid kultiveren dáhpáhuvvá earret eará dainna lágiin ahte dat stuorát jogat, main lea alla dienas, mákset alit lihttoláigohandivada. Oassi dain divadiin manná smávit jogaide, vai lihttoláigoheaddji ožžot resurssaid ovdánahttit daid jogaid buorrin luossajohkan, čuožžu preassadieđáhusas.

Buorre bivdu

– Leat olu FeFo-jogat mat veahážiid mielde gorgŋot badjeliidda. Lea, nu go almmuheimmet borgemánus, hui iešguđet láhkái. Muhtun jogat bohte hui maŋŋit johtui dan jagi, ja sáhtán gosii lohkat ahte mis lea leamaš hui buorre bivdu vaikko leige maŋŋit giđđa, lohká Steinar Normann Christensen.

Golggotmánus leat buot FeFo-jogaid loahpalaš sálašlogut raporterejuvvon.