-Almmuhus-
-Almmuhus-
OĐĐASAT– Ráját galggalii rahppot herggiide vai beasa­šeimmet gilvalit Suomas

– Ráját galggalii rahppot herggiide vai beasa­šeimmet gilvalit Suomas

-

-

Dán jagáš heargegilvocupa manná loahpaguvlui. Heargevuoddji Anne Risten Sara mielas ii leat gilvvuin seamma stáhtus go ovdal ja danin háliidivčče son gilvalit Suomas. 

Dán jagi leat oktiibuot leamaš njealje cup- heargegilvvohallama. Boahtte vahkoloahpa leat finálagilvvut Guovdageainnus.  Vássán vahkoloahpa lágiduvvui njealját cup gilvu Guovdageainnus gosa serve oktiibuot 20 hearggi. 

Heargevuoddji Anne Risten Sara muitala ahte leamaš unnán beroštupmi heargegilvvuide, ja sávvá ge eanet gehččiid finálagilvvuide mat lágiduvvojit boahtte vahkkoloahpa Suohpatjávrris. Su mielas ii leat heargegilvvuin šat dat seamma stáhtus Norggas go mii ovdal lávii, logi jagi dás ovdal.

– Heargegilvvut leat buot nohkan ja dasa leat olu sivat. Ovdal dahke heargegilvvut stuora márkaniid Guovdageainnus beassášáiggi, muitala heargevuoddji Anne Risten Sara. Suomas leat gilvvut hui stuorrát mas alit dássi ja eanet hearggit.

Suoma heargegilvvut

Go ođđa láhka bođii mainna galge eastadit CWD dávdda leavvamis Norgii, de dat dagahii ahte ii sáhttán šat herggiin rasttildit rajá gaskal Suoma ja Norgga. Dat váikkuhii ahte heargevuoddjit eai  sáhttán Norgga bealde herggiin šat gilvalit Suomas.

Loga maid:
Badjel guokte sekundda falit go earát

– Dat gotti olu movtta mis heargevuddjiin go eat beassan searvat sin gilvvuide, muitala Sara. Son muitala ahte lávii nu máilmmi somá vuolgit heargegilvvuide Supmii, ja sávvá ge dál ahte ráját fas rahppojit vai hearggit sáhtalii mátkkoštit Suoma gilvvuide ja vai mokta loktanivčče gilvalit ja hárjehallat.

– Lea deaŧalaš maiddái nuorra heargevuddjiide go sii han leat min boahtteáigi, dadjá son. 

Unna biras

Sara čilge ahte heargevuoddjin lea beare unna valáštallansuorgi Norggas odne

–Leat seamma olbmot geaiguin gilvvohallat ja geain leat hearggit Norggas. Dađi bahábut mis ii leat dat biras mii ovdal lei. Ja mun in hárjehala herggiin šat dego ovdal lávejin, mus ii lea motivašuvdna dasa go ii leat mihkke stáhtusiid vuoitit heargegilvvuid Norggas mu mielas. Dat unnu jagis jahkái dat heargebiras mis, muitala Sara. 

Loga maid:
Máhtte Áslat (12), Biret Julianne (14) ja Máhtte (13): Dá leat norgga­beale sámi hearge­gilvvohallamiid boahtte­áigi

Cupgilvu 

Vássán vahkkoloahpa gilvvohalai Anne Risten Sara su áhči herggiin Muzet Ena. 

– Manai oalle bures, lei dábálaš cupgilvu. Ledje sullii 20 hearggi gilvaleame ovttas junior luohkkáin. Mun vuiten vuosttaš beaivvi dan seniorluohkká. Nuppi beaivve vuittii fas heargi Super Tom, maid Mikkel Mathis Hætta eaiggáda  ja vuoddji lei John Inge Eira. 

VUITTII: Heargi Super Tom, eaiggát govas Mikkel Mathis Hætta, ja nubbi eaiggát Tom Høgli ii lean doppe dalle. Govven: Mikkel Andreas Eira
VUITTII: Heargi Super Tom, eaiggát govas Mikkel Mathis Hætta, ja nubbi eaiggát Tom Høgli ii lean doppe dalle. Govven: Mikkel Andreas Eira

Finála

Boahtte vahkoloahpa leat loahppagilvvut Suohpatjávrris Guovdageainnus, gos čađahuvvo 1000 mehter ja 2000 mehter vuoddjimat. Son sávvá gilvu oažžu eanet beroštumi ja geahččiid, go dá leat gilvvut masa dat buoremus hearggit servet. Son searvá su áhči ja ristáhči  herggiiguin.

– Ovcci buoremus hearggi ollislaš cupas besset searvat dáidda loahppagilvvuide Guovdageainnus. Mus eai leat alddán hearggit, muhto mun vuoján áhči ja ristáhči Lemmet Ámmun Eira herggiiguin.

–  Ja de vel lágiduvvo Karasprinta Kárášjogas skilleduorastaga, muhto dat ii gula ieš dan cupii, muitala heargevuoddji Anne Risten Sara. 

Bohtosat heargevuodjimiin Guovdageainnus cuoŋománu 2. beaivvi;

Senior luohkká

1. Heargi Muzet Ena,  John Isak Sara,  vuoddji Anne Risten Sara 

2. Heargi  Super Tom,  Tom Høgli/Mikkel Mathis Hætta, vuoddji Mikkel Jonas Eira

3. Heargi King Klæbo,  Johannes Klæbo, vuoddji Mikkel Jonas Eira

Junior luohkká

1. Heargi Tik Tok,  Anna Isabel Eira, vuoddji Mahtis Sara

2. Heargi GN čuoivvat,  MAME/MMH, vuoddji Biret Julianna Hætta

2. Heargi Argon,  Aile Sofie G. Sara, vuoddji Máhtte Aslat Eira

Bohtosat heargevuodjimiin Guovdageainnus cuoŋománu 3. beaivvi;

Seniorluohkká

1. Heargi Super Tom,  Tom Høgli/Mikkel Mathis Hætta, vuoddji John Inge Eira

2. Heargi Trommis,  Anders Nils K. Eira, vuoddji Anne Risten Sara

3. Heargi Muzet Ena, John Isak Sara. vuoddji Anne Risten Sara

Junior luohkká

1. Heargi Tik Tok,  Anna Isabel Eira,  vuoddji Mahtis Sara

2.Heargi Argon,  Aile Sofie G. Saraile Sofie G. Sara, vuoddji Máhtte Aslat Eira

3. Heargi Dolla Gazza,  Mihkkal Ánte Hætta, vuoddji Biret Julianna Hætta

-Almmuhus-