Rájáid rasttildeaba iežaska doaimmain

Jonna Rauhala ja ruvvejeaddji Joni Vanhapiha leaba bargoskihpárat geat leaba viiddidan iežaska doaimma ráji rastá.

– Munnos lea kapasitehta váldit vuostá olbmuid geat dárbbašit divššu, go lea dan mađe áigi lassin ahte sáhtte dahkat nu eará báikkis, muitaleaba soai.

Juolgedivššárin bargan

Jonna Rauhalas lea fitnodat Heahtás gos son fállá liikedikšuma olbmuide. Dál lea álggahan doaimma ránnjásuohkanis Guovdageainnus.

– Guovdageaidnulaččat leat sávvan dán fálaldaga go leat fitnan Heahtás divššus. Aiddo letne álggahan doaimma Loaŋkodievvái ja geahččaletne dál eanemus lági mielde oahpásmuvvat olbmuide vai dihtet fálaldaga birra, čilgeba soai.

Rauhala lea maid bargan moadde jagi Guovdageainnus dearvvašvuođaguovddážis juolgedivššuin, nu ii leat amas Guovdageidnui.

– Mus lea golmma jagi oahppu liikedikšumis, ja lean álgán boahtit Guovdageidnui juohke mánnodaga dál, muitala Jonna Rauhala. gii lea maid bargan moadde jagi Guovdageainnus dearvvašvuođaguovddážis juolgedivššuin.

Guhtta jagi bargan jo

Rauhala lea Leaibejávrris eret, hupmá sámegiela ja lea guhtta jagi bargan liikedivššuin Heahtás. Son fállá maid čalbmeguolggaid guhkidit dahje hábmet, diamántaliikedivššu, gazzadivššu ja ollu eará.

– Lean aiddo álgán aromaterapiijain, mii lea litnáset ruvven go dábálaš ruvven. Ruvvemiin buorida varrajođu rupmašis ja rumaš beassá vuoiŋŋastit, muitala Rauhala.

Guovdageaidnu lagat go Gilbbesjávri

Joni Vanhapiha lea oahppan ruvvejeaddji ja lea gávdnamis Guovdageainnus juohke gaskavahkku. Son lea bargan measta guokte jagi ruvvejeaddjin Heahtás.

– Mun lean eanaš áiggi barggus Heahtás, muhto lean johtán eará báikkiide ruvvenbargguin nu go Gilbbesjávrái. Dohko lea hui guhkki vuodjit, ja Guovdageaidnu lea ollu lagat Heahtá go Gilbbesjávri, muitala Vanhapiha gii liiko bargat Guovdageainnus.

Vaikke ii máhte ge sámegiela, de ii oainne giela hehttehussan, go muitala hupmat suomagiela, eaŋgalasgiela, spánskagiela ja veahá ruoŧagiela ja duiskagiela.