NAF-magasiidna lea nammadan buoremus borranbáikki Norggas go leat iskan guossohanbáikkiid mat leat váldoluotta lahkosis Davvinjárggas gitta Lindesnessii.
Badjelaš 100 borranbáikki leat árvvoštallon Davvinjárggas gitta Lindesnesii. Ii okta ge borranbáiki Finnmárkkus leat logi bajimusa searvvis, ovdal go olle Romssa fylkii. De ihte golbma guossohanbáikki listui.
Guossohanbáikkit leat ožžon čuoggáid Motor magasiinnas sihke biepmu ovddas, hattiid ovddas, ja movt guossohanbáiki lea muđuid.
Golbma báikki Romssas
Lea njealját jahki go Motor magasiidna nammada buoremus borranbáikki Norggas. Dán jagáš vuoiti lea Sanngrund Servering & Overnatting mii lea gaskal Oslo ja Kongsvingera. Doppe guossohit 100 000 gaskabeivviid jagis.
Nuppi sajis lea Mortens Kro, mii lea Haganis Akershusas.
Goalmmát saji juogadit vihtta guossohanbáikki mat ožžo seamma ollu čuoggáid. Guokte dain leat Romssa fylkkas: Bios Cafe Ráissas, Bergtatt Bistro Buskerudas, På Taket Reaššegeažis, Munkekroen Opplánddas, Haukeliseter Fjellstue Telemárkkus.
Vollan guossohanbáikkis lea maid okta unnit čuokkis ja lea maid dan 10 buoremusa searvvis.
Finnmárkku buoremus boradanbáiki
Trattoria Capri Vuonnabađas vuittii dán boradanbáikegilvvu jagi 2015:s. Dán háve ii olahan áibbas bajás gilvvus, muhto lea dušše guokte čuoggá vuollelis Vollan guossohanbáikki, mii lea dan logi buoremusa searvvis.
– Trattoria Capri lea buoremus boradanbáiki Finnmárkkus, čállá Motormagasiidna árvvoštallamis.
