Johttisámiid listtu sátnejođiheaddjeevttohas lohká ovdalii válljet ráinnas luonddu go ruvkkiid.
Johttisámiid listtu sátnejođiheaddjeevttohas lohká ovdalii válljet ráinnas luonddu go ruvkkiid.
Johttisámiid listtu sátnejođiheaddjeevttohas Anders Somby Jr. lea vástidan Ávvira válgagažaldagaide.
Ávvir lea jearran čuovvovaš gažaldagaid buot bellodatnjunnošiin:
1. Makkár ášši anát don deháleamos válgaáššin din suohkanis?
2. Mii du oaidnu lea dan áššis?
3. Mat leat du váibmoáššit?
Boazodoalu boahtteáigi deháleamos
Somby Jr. lohká boazodoalu boahtteáigi leat deháleamosin sin listui:
– Midjiide lea hirbmat dehálaš ahte boazodoalus lea buorre boahtteáigi, dan dáfus ahte mis leat eatnamat, buhtes eatnamat maid fertet gáhttet nu bures go vejolaš. Ráinnas áibmu, ráinnas čáhci ja ráinnas eana lea dehálaš.
– Mii válljet ovdalii ráinnas luonddu jus válljet galgat dan ja ruvkkiid gaskkas.
Váibmoáššit
Anders Somby Jr. namuha máŋga váibmoášši ja álggaha vuos boazologu heivehemiin:
– Boazodoaloláhka ferte rievdaduvvot nu ahte riektesihkkarvuohta nannejuvvo maiddái dain geain ii leat siidaoasus. Boazologuheiveheami oktavuođas fertejit buorit proseassat boazodoalolága mielde ja stáhta ferte veahkehit daid geat leat olu šaddan geahpedit viidásat. Dán gielddas leat olu dakkár olbmot, mii gieldda bealis, fertet leat mielde váikkuheamen fárrolaga buot boazodolliin. Ii sáhte okta ja okta ráhčat.
Lassin boazodoalu eatnamiid gáhttemii de lea sidjiide maid dehálaš seailluhit árbevirolaš ealáhusaid mat gávdnojit ja oččodit ođđa movttiidahtti doaimmaid nu mo turismma ja biergočuohpahagaid.
– Mii fertet maid seailluhit árbevieruid, ovdamearkka dihte eai máhte gallis šat johkafatnasiid, reagaid ja leaŋggaid duddjot. Lea min sápmelaččaid ovddasvástádus viidásat fievrredit dieid máhtuid, galggašii vuođđoskuvllain jo válljenfágan diet. Dákkár doaimmat sáhtašedje addit maid lassidietnasiid olbmuide, vástida Anders Somby Jr.
