Rahpet ođđa čalbmepoliklinihka Hammerfestii

Čalbmepoliklinihkka rahppo ođasmahtton lanjain Hammerfeastta buohcciviesu vuosttaš gearddis, čállá Finnmárkku Buohcciviessu preassadieđáhusastis.

Buoret dikšu go ovdal

Váldodoavttir Reidar Lager lea jahkeviissaid mátkkoštan Tromssa ja Hammerfeastta gaskka ja áigodagaid bargan Hammerfeastta buohcciviesus, muhto dál váldá Kari Milch Agledahl badjelasas dán barggu fásta dásis.

– Go Hammerfeasttas lea fásta čalbmedoavttir de olu pasieanttat eai dárbbaš mátkkoštit Tromsii buohccivissui, ja olu pasieanttat eai soaitte dárbbašit nu guhká vuordit beassat dikšui, čálle buohcciviessu.

Dasa lassin beassá Finnmárkku Buohcciviessu fállat buoret divššu go ovdal ja viidát fálaldaga, go buohcciviessu ii leat dušše investeren gelbui muhto maiddái olu ođđa rusttegiid oastán.

Hammerfeastta buohcciviessu sáhttá ge de fállagoahtit divššu earret eará ránessmáitti, ruonásmáitti ja čalbmevigiid vuostá mat bohtet sohkardávddas.

(Ášši joatká gova vuolábealde)

Buoriduvvo vel eanet

Dasa lassin buoriduvvo čalbmepoliklinihkka vel eanet boahtte jagi, go dal ostet laserapparáhtaid ja ultrajietnamášiinna. Nu sáhttá buohcciviessu áiggi mielde vel buorebut dikšut sin geat bártidit čalbmevigiiguin.

Čalbmedoavttir lihkkus ii galgga okto dikšut buohkaid, buohcciviessu lea maid virgádan čuohpahanbuohccidikšára ja oahpahan sierra buohccidikšáriid mat galget čalbmepoliklinihkas veahkkin dikšut buhcciid.

– Lea áibbas ođđa poliklinihkka mii dál ásahuvvo, ja bargu ferte dađistaga buorránit. Mii geahččalat heivehit dili nu ahte šaddá bures organiserejuvvon čalbmepoliklinihkka mii áimmahuššá olbmuid dárbbuid ja bures ovttasbargá fástadoaktáriiguin ja optihkkariiguin, čállá Finnmárkku Buohcciviessu