Guovdageainnu girku ja Guovdageainnu suohkan čalmmustahttet Iešsorbmeneastadeami máilmmibeaivvi dán mánu 10. beaivvi. Girku bovde oapmahaččaid ja earáid rabas girkui.
– Guovdageainnu girku háliida dan oktavuođas bovdet oapmahaččaid ja earáid rabas girkui. Girkus deaivvadat suohkanpsykologain, heahtejoavkkuin ja psyhkalaš dearvvašvuođajoavkkuin, čállá Guovdageainnu girku diakonabargi Henriette Kristensen Fjeldstad preassadieđáhus.
Čalmmustahttin
Maŋŋebárgga, čakčamánu 10. beaivvi, lea Iešsorbmeneastadeami máilmmibeaivvi. Dan oktavuođas bovde Guovdageainnu girku rabas girkui gaskkal diibmu 18 ja 20.
Diibmu 18.30-19 čuojaha organista Torbjørn Stålberg ja Nilsa Nutti ja Inger Johanne Oskal lávluba. Suohkanpsykologa muitala maid suohkana fálaldagaid birra sidjiide geat leat vásihan ahte lagas olmmoš lea sorbmen iežas.
– Lea dehálaš fáddá man mii háliidit loktet, sihke servodahkan ja olmmožin. Doppe lea vejolašvuohta cahkkehit čuovggaid, váldit mielde liđiid ja hávdegintaliid hávdeeatnamiidda ja lea maid vejolašvuohta háleštit ja gáfestallat, lohká Fjeldstad.
