-Almmuhus-
-Almmuhus-
OĐĐASATRahpet fas ealgabivddu Bajit Anárjoga álbmotmeahcis 

Rahpet fas ealgabivddu Bajit Anárjoga álbmotmeahcis 

-

-

FeFo rahpá fas dán jagi ja boahtte jagi ealgabivddu Bajit Anárjoga álbmotmeahcis buot fylkka bivdiide.

Dasa lassin rahppojuvvo vejolašvuohta ahte earát go Finnmárkku ássit sáhttet ohcat beassat bivdit Bajit Anárjoga álbmotmeahcis helikoptersáhtuin, muhto ii fal ovdal go báikkálaš álbmot lea ožžon dán fálaldaga álggos.

 

Sáhtostit ealgabivdiid helikopteriin 

Šaddet čieža bivdoguovllu álbmotmeahci olggut ravdda mielde gos bivdojoavkkut sáhttet cegget leairra álbmotmeahci olggobeallái, ja vihtta bivdoguovllu guhkkin álbmotmeahcis gosa bivdojoavkkut dolvojuvvojit helikopteriin.

Bivdoáigi álbmotmeahci olggut ravdda bivddu dáfus lea čakčamánu 1. beaivvi rájes golggotmánu 15. beaivvi rádjái.

Bivddu dáfus, mii mielddisbuktá helikoptersáhtu bivdojoavkkuide, lea bivdoáigi čakčamánu 13.-14. beaivvi rájes gitta čakčamánu 24.-25. beaivvi rádjái.

 

Ii leat várrejuvvon báikkálaš bivdojoavkkuide

Ii oktage dáin fálaldagain leat várrejuvvon báikkálaš bivdojoavkkuide, dan sadjái leat vásedin várrejuvvon bivdoguovllut suohkaniid ássiide lasihuvvon muđui Kárášjoga ja Guovdageainnu suohkaniin.

Suohkana ja fylkka ássit, geat leat ožžon ealgabivdofálaldaga eará guovlluin Finnmárkkuopmodagas, sáhttet maiddái ohcat ja oažžut dáid fálaldagaid seamma ládje go olbmot geat orrot olggobealde Finnmárkku, maŋŋel go bivddu vuosttaš vuorbádeapmi lea čađahuvvon.

Juohke jagi leat lagabui čuođi bivdojoavkku bivdofálaldaga haga maŋŋel ealgavuorbádeami.

Stuorafuođđobivdu lea vuoigatvuohta mii Finnmárkku ássiin lea, ja FeFo galgá leat dáhkideaddjin dasa ahte ássit besset guolástit ja bivdit.

– Danne geahččalit mii dál oažžut áigái bivddu suodjaluvvon guovllus mii sáhttá sihke unnidit guohtundeattu dálvet ja mii lea ekonomalaččat ceavzil, dadjá FeFo stivrajođiheaddji Bente Haug kommentáras preassadieđáhusas.

 

Gollorámma lea 800 000 ruvnno

– Čađaheapmi ja heiveheapmi galgá dahkkojuvvot nu ahte ceavzilvuohta ja várrogas luonddugeavaheapmi Bajit Anárjoga álbmotmeahcis lea guovddážis, deattuha Haug.

FeFo áigu čađahit ealgabivddu Bajit Anárjoga álbmotmeahcis áigodagas 2019-2020. Bivdu lea bušetterejuvvon bissut balánssas, ja gollorámma lea 800 000 ruvnno.

– Eaktuduvvo ahte unnimustá golbma dan viđa bivdofálaldagas, mat mielddisbuktet helikoptersáhtu bivdiide ja rusttegiidda, leat devdojuvvon ovdal geassemánu 1. beaivvi jus bivdu galgá čađahuvvot, loahpaha Bente Haug.

 

Sáhttá fállat olggobeallái fylkka 2020:s

Jus fylkka iežas ássiin lea unnán beroštupmi dán jagi, de áigu FeFo geahčadit molssaevttolaš vugiid movt dán bivddu sáhttá fállat olggobeallái fylkka 2020:s.

Ovddit háve go čađahuvvui ealgabivdu Bajit Anárjoga álbmotmeahcis lei 2015:s.

Dalle čađahuvvui bivdu dušše álbmotmeahci ráji mielde.

-Almmuhus-