Čakčamánu 1. beaivvi rahppojit klinihkat vejolaš veagalváldiide Oslos, Bergenis ja Stavangeris. Leat jo moattis geat leat dieđihan beroštumi.
– Mun lean ožžon máŋga telefovnna ja e-poastta olbmuin geat jearahit goas mii rahpat. Duođalaš olbmot geat háliidit veahki, dadjá psykologaspesialistta Marthe Halvorsen Kjærstad NRK:i.
Son lea Oslo universitehtabuohcciviesu spesialpoliklinihkalaš ovttadaga (OUS) ovttadathoavda gii galgá jođihit dán fálaldaga Oslos.
Fálaldat lea ovddiduvvon Dearvvašvuođadirektoráhtas maŋŋel go Redd Barna-raporta konkluderii ahte Norggas váilu fálaldat vejolaš veagalváldiide.
– Váldoulbmil lea juhkkon guovtti guvlui: Nubbi lea hehttet seksuálalaš veagalváldima mánáide. Nubbi lea veahkehit olbmuid geat háliidit anašit mánáiguin. Lea lossat sidjiide geat leat dán ulbmiljoavkkus. Mii háliidat sin veahkehit, dadjá Kjærstad.
Fálaldat, mas lea namma «Det finnes hjelp», rahppo čakčamánu 1. beaivvi. Dalle ásahuvvojit Stavangerii ja Bergenii maid sierra dikšoklinihkat. Gaska-Norgga Dearvvašvuohta ja Davvi Dearvvašvuohta ásahit klinihkaid 2021:s.
Daid klinihkaid lassin čuovvu fálaldagas anonyma chat-bálvalus, mii lea rabas gaskal diibmu 12-14, vuossárggas bearjadahkii.
©NTB
